Ўзбекистон ва Словакия муносабатларни стратегик шериклик даражасига олиб чиқди

Тошкент шаҳрида бўлиб ўтган музокаралар якунида Ўзбекистон президенти Шавкат Мирзиёев ва Словакия бош вазири Роберт Фицо Стратегик шериклик муносабатларини ўрнатиш тўғрисидаги қўшма декларацияни имзолади. Бу ҳақда Президент матбуот хизмати хабар қилди.

Етакчилар ҳузурида икки томонлама ҳужжатлар, хусусан:

• дипломатик кадрлар тайёрлаш тўғрисида;
• қишлоқ хўжалиги соҳасидаги ҳамкорлик тўғрисида;
• стандартлаштириш, метрология ва товарларнинг мувофиқлигини баҳолаш соҳасидаги ҳамкорлик тўғрисида;
• энергетика бозорларини тартибга солиш соҳасидаги ҳамкорлик тўғрисидаги битимлар;
• 2025−2026 йилларга мўлжалланган ташқи ишлар вазирликлари ўртасидаги ҳамкорлик дастури;
• 2025−2026 йилларга мўлжалланган стандартлаштириш соҳасидаги ҳамкорлик дастури алмашилди.

Аввалроқ Ўзбекистон ва Словакия товар айирбошлашни ошириш, автомобиль қисмларини маҳаллийлаштириш, туризм ва фармацевтика соҳаларида йирик қўшма лойиҳаларни йўлга қўйишга келишиб олгани ҳақида хабар қилгандик.