Яқин ойларда Ўзбекистон президентининг Брюсселга ташрифи кутилмоқда — ЕИ элчиси

Европа Иттифоқи яқин бир неча ой ичида Ўзбекистон президенти Шавкат Мирзиёевнинг Брюсселга ташрифини кутмоқда. Бу ҳақда Европа Иттифоқининг мамлакатдаги элчиси Тойво Клаар 10 июнь куни Тошкент инвестиция форумида сўзлаган нутқида айтиб ўтди.

«Бу тарихий ташрифга айланади, Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги битимни имзолаш, шунингдек, муносабатларимиз чуқурлашиб бораётганини намойиш этиш учун тарихий имконият бўлади», — деди дипломатик миссия раҳбари.

Унинг сўзларига кўра, кузда ҳам Тошкентда, ҳам Брюсселда ишбилармонлик алоқаларини ривожлантиришга қаратилган қатор тадбирлар ўтказилиши режалаштирилмоқда.

«Бундан ташқари, Global Gateway ташаббуси доирасида биз Марказий Осиёдаги ҳамкорларимизни кузда бўлиб ўтадиган ва бутун дунёга Европа Иттифоқининг бошқа мамлакатлар билан тенг ҳуқуқли ҳамкорлик қилишдан манфаатдорлиги ҳақида сигнал бўладиган халқаро форумда иштирок этишга таклиф қилмоқчимиз. Айниқса, бу Марказий Осиё, хусусан, Ўзбекистонга тааллуқли, — дея таъкидлади Тойво Клаар.

Global Gateway иккинчи форуми 9−10 октябрь кунлари Брюсселда бўлиб ўтади. Тадбир геосиёсий ва геоиқтисодий муаммолар олдида глобал ўзаро боғлиқликни илгари суришга бағишланиши кутилмоқда.

Эслатиб ўтамиз, аввалроқ Ўзбекистон президентининг Брюсселга ташрифи 2025 йилнинг биринчи ярмида амалга оширилиши кутилганди.