Ўзбекистон ва Болгария президентлари икки томонлама ҳамкорликни кенгайтириш тўғрисида декларация имзолади

Тошкент шаҳрида бўлиб ўтган музокаралар якунида Ўзбекистон президенти Шавкат Мирзиёев ва Болгария президенти Румен Радев икки томонлама ҳамкорликни кенгайтириш тўғрисида қўшма декларацияни имзолади, деб хабар қилди давлат раҳбари матбуот хизмати.

Етакчилар ҳузурида икки томонлама ҳужжатлар, жумладан, Ташқи ишлар вазирликлари ўртасида 2026−2027 йилларга мўлжалланган ҳамкорлик дастури ҳамда Тошкент ва София шаҳарлари ўртасида шериклик муносабатларини ўрнатиш тўғрисидаги битим алмашилди.

Аввал хабар қилинганидек, Ўзбекистон ва Болгария агросаноат мажмуаси ва озиқ-овқат саноати, фармацевтика, геология ва туризм соҳаларида қўшма лойиҳаларни илгари суриш бўйича келишиб олди. Мамлакатлар икки давлат ўртасида тўғридан-тўғри авиақатновларни йўлга қўйиш ва Софияда Ўзбекистон Миграция агентлиги ваколатхонасини очиш имкониятларини кўриб чиқади.