«Бугуннинг ўзида бузиб ташлайсан — ичидаги одами билан». Бухоро вилояти ҳокими бинони судсиз бузишни буюрди
«Боғчанинг «территория»сига кирганларнинг (бино қурганларнинг — таҳр.) ҳаммасининг ҳуқуқий «документ»ларини кўтарасан. Йўғини ҳеч кимни эшитмасдан бузасан, «суд-пуд» демасдан бузиб ташлайсан. Бугуннинг ўзида бузиб ташлайсан, нарсалари билан, ичидаги одами билан кўмиб ташлайсан… Бўлди энди «суд-пуд» деб ҳаммасини эркалатиш. Орқадан эшик очганнинг ҳужжатини кўрасан», — деган у.
Kun.uz'нинг таъкидлашича, ҳоким, шунингдек, вилоят ички ишлар бошқармаси бошлиғини тартиб ўрнатмаса, «тинчроқ туман»га ўтказиш билан таҳдид қилган:
«Ўртоқ началник, сиз «ест»дан олдин… Кечаям вилоят ҳокими келяпти, мен кузатдим, бемалолроқ бўлгансизлар бутунлай шаҳарда. Бугун ҳам бу ерда аҳвол ҳаминқадар. Ё бу жиноятчиликка омил бўлувчи ҳолатларнинг олдини олинг, ё бўлмаса сизни тинчроқ туманга жўнатай. «Уже» мен топшириқ бердим. Тушундингизми? Ўзгариш қилинг».
Шунингдек, Ботир Зарипов шаҳар ҳокимининг ижтимоий соҳага масъул ўринбосарига нисбатан интизомий жазо қўллашни режалаштираётганини айтди: «Агар шаҳар бўйича ижтимоий соҳа объектлари мен айтган нуқтайи назардан танқидий кўриб тузатилмаса, у кишига жавоб берилади. Бу шаҳар ҳокимининг ҳамма ўринбосарларига „урок“ бўлсин».
Учрашув қаерда ва қачон бўлиб ўтгани ва ёзиб олингани ҳақида маълумот берилмаган. Ҳокимлик ҳозирча вазиятга изоҳ бермади.
Бухоро шаҳри ҳокимининг ёшлар, ижтимоий ривожлантириш ва таълим масалалари бўйича ўринбосари Феруз Ҳамроевнинг Kun.uz'га маълум қилишича, буйруқ боғча ҳудудига эмас, балки унинг ташқарисида жойлашган омборга ўхшаш бинога тегишли.
Бироқ у журналистнинг: «Ҳоким видеолавҳада ичидаги одами билан кўмиб ташла, дея буюрган, шунда омборхона назарда тутилганми?», деган саволини жавобсиз қолдирган.
Вилоят ҳокимлиги матбуот котиби Gazeta сўровига жавоб қайтарди ва тез орада расмий изоҳ эълон қилинишини айтди. У, шунингдек, ҳоким ҳозирда иш сафари билан Хитойда бўлиб турганини қўшимча қилди.