Эрондан 30 дан ортиқ ўзбекистонлик эвакуация қилинди — ТИВ
Қайд этилишича, улар Эрон ҳудудидан Туркманистон ва Озарбайжон орқали эвакуация қилинган. Мазкур жараёнда Туркманистон, Озарбайжон ва Эрон яқиндан кўмак берган.
«Фуқароларимизнинг хавфсизлигини таъминлаш мақсадида барча зарур чоралар кўрилмоқда. Эрон ва Исроилдаги элчихоналаримиз 24/7 режимида фаолият юритмоқда», — дейилади хабарда.
Вазирлик айни пайтда ушбу давлатларда бўлиб турган фуқароларга хавфсиз жойларда бўлиш, расмий ахборотларни доимий равишда кузатиб бориш ва элчихоналар билан алоқада бўлишни тавсия этди.
Эрондаги элчихона алоқа маълумотлари:
- Телефон: +98 (21) 22299780, 22832025;
- Электрон почта: iri.uzembassy@mfa.uz.
Исроилдаги элчихона алоқа маълумотлари:
- Телефон: +972 (3) 672−2466, 672−2371, 758−5075, 758−5076;
- Шошилинч хабарлар учун: +972 (54) 485−1397;
- Электрон почта: il.uzembassy@mfa.uz.
Исроил 13 июнь куни Эрондаги нишонларга, жумладан, ядровий обектларга бир нечта зарбалар берди. Операциянинг мақсади — «Эроннинг яҳудий давлати мавжудлигига таҳдидининг олдини олиш». Ҳужум оқибатида Эроннинг уч нафар юқори мартабали қўмондони ва олти нафар ядрочи олим ҳалок бўлди. Эрон бунга жавобан 100 дан ортиқ дрон учирди ва Исроилни «қаттиқ жазо» билан таҳдид қилди.
Ўзбекистон ТИВ аввалроқ ушбу давлатларда бўлиб турган ватандошларни огоҳликка чақирганди. Uzbekistan Airways Тошкентдан Тель Авивга парвозларни июнь ойи охиригача тўхтатди ҳамда Дубай ва Шарм аль Шайхга парвозлар жадвалига ўзгартириш киритди. Тель Авивга энг яқин рейслар Qanot Sharq ва Air Samarkand томонидан бекор қилинди. Centrum Air авиакомпанияси Тошкент-Дубай йўналишини ўзгартирди.