Президент ишсизлик ва камбағалликни қисқартирган ҳокимларнинг маошларига «икки карра бонус» беришни ваъда қилди

Президент Шавкат Мирзиёев 19 июнь куни Қарши шаҳридан Шаҳрисабзга кетаётиб, поездда қашқадарёлик фаоллар билан мулоқотда бўлди.

Норасмий муҳитда ўтган суҳбат ҳудудларни ривожлантириш, аҳоли фаровонлигини ошириш, ислоҳотларни амалга ошириш масалаларига бағишланди.

Ҳудудлар имкониятини тўлиқ ишга солиш ва камбағалликни қисқартиришга қаратилган дастурлар натижасида меҳнат шароитлари яратилаётгани алоҳида таъкидланди.

Президент мева ва сабзавот етиштириш учун дарахтсиз ўрмон ва яйлов ерларини аҳолига бериш мумкинлигини айтди.

«Бизда 16 млн гектар яйлов, 12 млн гектар ўрмон ери бор. Бу бизнинг кўмагимиз, заминимиз, келажагимиз. Мева-сабзавот етиштиришни кўпайтиришимиз керак», — деди у «Ўзбекистон 24» телеканали сюжетида.

«Шу ерларни одамларга бўлиб беришимиз керак. Тарвуз, булғор қалампири, помидор. Помидорни қуритсангиз, нархи 10 баробар ошади. Қайта ишлаш ва қўшимча қиймат», — деди давлат раҳбари поезд ойнаси ташқарисидаги ер участкаларини кўрсатиб.

Давлат раҳбари йўл инфратузилмаси масалаларига ҳам эътибор қаратди. Президент бунинг нафақат иқтисодиёт, балки аҳоли кайфияти учун ҳам аҳамиятини таъкидлаб, йўл тармоғини янгилаш бўйича лойиҳаларни амалга оширишни жадаллаштириш бўйича кўрсатмалар берди.

«Охирги икки йилда мамлакатимизда 40 минг км йўл ва 540 та кўприк таъмирланди. Жорий йилда Қашқадарё вилоятида яна 100 км магистраль йўлни таъмирлаш режалаштирилган», — деди у.

Президент, шунингдек, туташ ҳудудларни ободонлаштиришни таъминлаш, шунингдек, Транспорт вазири Илҳом Маҳкамов ва Автомобиль йўллари қўмитаси раиси Жамшид Турсуновга Қашқадарёдаги ички йўлларни модернизация қилиш бўйича Осиё тараққиёт банки (ОТБ) раҳбарияти билан музокаралар олиб бориш бўйича топшириқлар берди.

«ОТБ билан биргаликда ўтаётган йўл лойиҳасини кўриб чиқинг. Қанча километр ва қанча пул керак, ўйланглар. Йўл бўлмаса, иқтисод ҳам бўлмайди. Йўлнинг икки томонига дарахт экиш керак», — деди Шавкат Мирзиёев.

Унинг сўзларига кўра, ҳоким маълум кўрсаткичларни бажарса, иш ҳақида рағбатлантирилиши мумкин бўлади.

«Ҳоким президент вакили сифатида «ислоҳотлар штаб»ини тузиб, салгина ўзини қийнаса, уч ой давомида туманини ишсизликдан холи ҳудудга айлантирса, камбағалликни қисқартириб, инвестиция олиб кирса, «икки карра қўшимча бонус» берилади», — деди у.

Аввалроқ давлат раҳбари 1 августдан Ўзбекистоннинг барча вилоят ва туман ҳокимликларида иш ҳақи оширилиши, қўшимча тўловлар ва мукофотлар жорий этилишини маълум қилганди . Тўққизта асосий вазирлик ва идораларнинг туман бўлимлари (дастлаб 8 таси таклиф қилинган) туманлар ҳокимлари ихтиёрига ўтказилади ва «Ислоҳотлар бўйича штаб» тузилади.

«Лекин қарсак чалиш учун икки қўл уриш керак. Ўзига юкланган вазифаларни бажара олмаган ходимларга нисбатан чоралар кўрилади. Шундагина ҳамма интизом ва режа асосида ишлашни ўрганади», — деди президент.