«МО давлатлари ва Хитой абадий яхши қўшничилиги шартномаси — минтақавий барқарорликни таъминлашнинг муҳим воситаси» — ТИВ

Ўзбекистон Ташқи ишлар вазирлиги 17 июнь куни Остона шаҳрида бўлиб ўтган «Марказий Осиё — Хитой» иккинчи саммитининг асосий якунлари бўйича Gazeta’га изоҳ берди. Ташкилот «Абадий яхши қўшничилик, дўстлик ва ҳамкорлик тўғрисида»ги шартнома муҳимлигини таъкидлаб, Хитой билан ҳамкорликнинг кейинги йўналишларини баён қилди.

Саммитнинг асосий натижалари

«Марказий Осиё — Хитой» иккинчи саммитини ишонч билан муваффақиятли деб аташ мумкин, деб ҳисоблайди Ташқи ишлар вазирлиги, чунки у стратегик шерикликни мустаҳкамлаб, ҳамкорликни янада чуқурлаштиришга замин яратди.

Ташқи ишлар вазирлиги саммитнинг учта асосий натижасини қайд этди:

1. Марказий Осиё давлатлари ва Хитой ўртасида абадий яхши қўшничилик, дўстлик ва ҳамкорлик тўғрисидаги шартноманинг қабул қилиниши минтақавий барқарорлик ва узоқ муддатли шерикликни таъминлашнинг муҳим воситаси сифатида қаралмоқда.
2. Ҳамкорликнинг янги механизмларини, жумладан, чўлланишнинг олдини олиш, таълим, қашшоқликни бартараф этиш ва узлуксиз савдо платформаси бўйича қўшма марказларнинг ишга туширилиши.
3. Товар айирбошлаш ҳажми 100 миллиард долларга кўпайиши, 10 мингдан ортиқ қўшма корхона ва лойиҳалар реализацияси орқали тасдиқланган иқтисодий ҳамкорликнинг ўсиши.

Абадий яхши қўшничилик тўғрисидаги шартноманинг долзарблиги ҳақида

«Абадий яхши қўшничилик, дўстлик ва ҳамкорлик тўғрисидаги шартнома Марказий Осиё давлатлари ва Хитой ўртасидаги ишонч, барқарорлик ва ўзаро манфаатли шерикликни мустаҳкамловчи тарихий ҳужжат ҳисобланади. Унинг роли минтақада барқарор ривожланишга кўмаклашувчи ва умумий муаммоларни ҳал этишга хизмат қилувчи узоқ муддатли ҳамкорлик учун мустаҳкам ҳуқуқий ва сиёсий асос яратишдан иборат», — дейилади ТИВ хабарида.

Шартноманинг долзарблиги қуйидаги омиллар билан тасдиқланади:

• Халқаро вазиятнинг ёмонлашуви, жумладан, глобал кучлар ўртасидаги зиддиятлар ва ишончсизликнинг кучайиши барқарорликни таъминлашнинг минтақавий механизмлари зарурлигини таъкидламоқда.
• Ишонч ва шериклик маконига айланиб бораётган Марказий Осиёнинг чуқур трансформацияси Хитой билан қўшма ташаббусларни амалга ошириш учун қулай шарт-шароит яратмоқда.
• Хитойнинг дўстона муносабатларни ва минтақанинг иқтисодий салоҳиятини Хитойнинг саноат етакчилиги билан интеграциялашувига ёрдам берадиган «Бир камар — бир йўл» ташаббусига содиқлиги.

Хитой билан ҳамкорлик йўналишлари

Қисқа муддатли перспективада Ўзбекистон Хитой билан ҳамкорликнинг қуйидаги устувор йўналишларини кўрмоқда:

Савдо ва инвестициявий шериклик: Савдо ва инвестициялар бўйича минтақалараро кенгашни ташкил этиш, савдони рағбатлантириш ва экспортга кўмаклашиш мақсадида «Электрон Ипак йўли» кўп томонлама савдо майдончасини ва Тошкент шаҳрида Саноатда стандартлаштириш ва сертификатлаштириш минтақавий марказини ишга тушириш.

Транспорт ва инфратузилма алоқаси: Хитой — Қирғизистон — Ўзбекистон темирйўли қурилишини бошлаш, Трансафғон темирйўлини қўллаб-қувватлаш ва логистика инфратузилмасини модернизация қилиш учун транспорт йўлакларининг ягона харитасини ишлаб чиқиш.

Яшил ривожланиш ва рақамлаштириш: 2030 йилгача «Яшил» ривожланиш дастурини амалга ошириш, чўлланишга қарши кураш бўйича Экологик альянсни ташкил этиш, шунингдек, оптик толали алоқа линиясининг рақамли трассасини ва иқтисодиётда сунъий интеллектни ривожлантириш.

«Ушбу соҳалар иқтисодий ўсиш, барқарорлик ва минтақанинг Хитой билан интеграциялашувига кўмаклашувчи синергик самара беради», — деб ишонч билдирди Ўзбекистон ТИВ.