Тошкент ҳокимининг ёпиқ қарорлари улуши 67% дан ошди
Таққослаш учун, 2024 йилнинг шу даврида ҳокимликнинг 763 та қарори қабул қилинган бўлиб, улардан 405 таси (53,1%) очиқ ва 358 таси (46,9%) ёпиқ эди, шу жумладан, 277 тасида ХДФУ белгиси бўлган.
Шу тариқа қарорларнинг умумий сони 5,2 фоизга (+40 та ҳужжат), ёпиқ қарорлар улуши эса 46,9 фоиздан 67,1 фоизга ошди.
Пойтахт халқ депутатлари кенгаши, аксинча, ошкораликни оширди. 2025 йилнинг январидан август ойининг ўрталарига қадар у 172 та қарор қабул қилди, шундан 135 таси очиқ, 37 таси ёпиқ. Бир йил аввал худди шу даврда 130 та қарор қабул қилинган — 110 та очиқ ва 20 та ёпиқ. Ҳужжатлар сони қарийб учдан бирига ошди, очиқлик даражаси юқорилигича қолмоқда — 2024 йилдаги 85 фоизга нисбатан 78 фоиз.
Жаҳонгир Ортиқхўжаев Тошкент шаҳри ҳокими бўлган 2022 йилнинг январидан 18 августигача бўлган даврда пойтахт ҳокимлиги томонидан 1040 та қарор қабул қилинган бўлиб, шундан 607 таси (58%) жамоатчилик эътиборига ҳавола қилинган, 433 таси эса ёпилган. Шу даврда халқ депутатлари кенгаши томонидан 225 та қарор қабул қилинган бўлиб, улардан 172 таси (76,4%) очиқ, 53 таси (23,6%) эса ёпиқ қарорлар ҳисобланади.
Шу тариқа Тошкент шаҳри ҳокимлиги ўз қарорлари билан танишиб чиқишни тез-тез чеклай бошлади.
Адлия вазирлигининг қайд этишича, ҳокимлар қайси ҳужжатларни жамоатчиликка эълон қилиш ва қайсиларини эълон қилмаслик тўғрисида қарор қабул қилиши мумкин. Қонунга кўра, ҳокимликлар айрим ҳолларда фойдаланиш чекланган маълумотларни (мудофаа, хавфсизлик, шахсий маълумотлар, васийлик ва ҳомийлик тўғрисидаги маълумотлар ва бошқалар) ўз ичига олган қарор ва фармойишларни чиқаради.
Бироқ 2022 йилнинг ноябрида Gazeta ҳокимлик шаҳар бюджетининг биринчи яримйилликдаги даромадлари ва харажатлари бўйича кенгаш қарорларини эълон қилиб, кейин уларни яширганини аниқлаган. Кейинроқ Адлия вазирлиги ҳужжатлар билан танишиш тикланганини маълум қилганди.
Шу билан бирга, пойтахт ҳокимлиги томонидан баъзан хўжалик қарорлари жамоатчиликка эълон қилинмайди. Хусусан, 2022 йилда май-август ойларида олтита фестиваль ўтказиш учун ҳокимлик томонидан 18 миллиард сўм сарфланган, бироқ барча шартномалар тўғридан-тўғри тузилган, улар ҳақидаги ҳужжатлар E-Qaror порталига жойлаштирилмаган. Кейинроқ Бош прокуратура собиқ Тошкент Маданият бош бошқармасида давлат харидлари тўғрисидаги қонун ҳужжатлари бузилиши ҳолатларини аниқлаб, фестиваллар вақтида бюджет маблағлари ўғирлангани ҳақида хабар берганди.
2024 йил октябрь ойида Тошкент шаҳри ҳокими Шавкат Умурзоқов иссиқлик таъминотига субсидиялар учун 100 миллиард сўм ажратиш тўғрисида қарор қабул қилиб, ҳужжатда киришни чеклашни талаб қилувчи маълумотлар бўлмаса-да, яширган эди. Шу билан бирга, етим болаларга уй-жой ажратиш қарори эса болаларнинг исм-шарифи ва манзили кўрсатилган ҳолда эълон қилинган.
2023 йил март ойида Тошкент шаҳри туманлари ҳокимларининг янги таҳрирдаги Ўзбекистон Конституцияси лойиҳасини тарғиб қилиш бўйича тарғибот гуруҳлари тузиш тўғрисидаги қарорлари яширилиб, Тошкент шаҳри ҳокимининг бу ҳақдаги қарори олиб ташланган.
2024 йил октябрь ойида Коррупцияга қарши курашиш агентлиги директори Акмал Бурхонов 2023 йилда ҳокимликлар томонидан 115 мингта қарор қабул қилингани, шундан 43 мингтаси (37,3 фоизи) ноқонуний равишда ёпиқ форматга ўтказилганини маълум қилганди. Унинг сўзларига кўра, бунга қарши курашиш учун қонунчиликка ўзгартиришлар ишлаб чиқилган, бироқ улар ҳали қабул қилинмаган.
«Биз 194 та ёпиқ қарорни танлаб ўрганиб чиқдик. Уларни очганимизда биноларни қуриш учун маблағ ажратиш, шунингдек, ходимларни рағбатлантириш ва мукофотлаш бўйича қарорлар бор эди… Қарорларнинг 30 фоиздан ортиғи ёпиқ, яъни улар маблағларни ўз хоҳишига кўра ишлатиши мумкин бўлган», — деганди у.