Шавкат Мирзиёев ва унинг рафиқаси Хитойга етиб борди

Шавкат Мирзиёев Хитой раиси Си Цзиньпиннинг таклифига биноан рафиқаси Зироат Мирзиёева билан бирга расмий ташриф билан Тяньцзинь шаҳрига етиб борди. Ўзбекистон президенти матбуот хизмати ташрифдан айрим фотосуратларни эълон қилди.

«Биньхай» халқаро аэропортида Ўзбекистон раҳбарини ХХР транспорт вазири Лю Вэй ва бошқа расмийлар кутиб олди.

Анъанага кўра, меҳмонлар шарафига икки мамлакатнинг давлат байроқлари кўтарилди, фахрий қоровул саф тортди.

Ташриф дастурига мувофиқ, Ўзбекистон етакчиси 31 август — 1 сентябрь кунлари Шанхай ҳамкорлик ташкилоти давлат раҳбарлари кенгашининг навбатдаги мажлиси ва «ШҲТ плюс» форматидаги саммит тадбирларида иштирок этади.

Ўзбекистон президенти ўз нутқида кўп томонлама ҳамкорликни мустаҳкамлаш ва ташкилот фаолиятини такомиллаштириш бўйича муҳим ташаббусларни илгари суради, дея қўшимча қилди матбуот хизмати.

Шавкат Мирзиёев сўнгги бор 2024 йилнинг январида Хитойга давлат ташрифи билан борганди.

Фото