Ўзбекистон 8 йил ичида нималарга эришди? Сўз — президентга

Шавкат Мирзиёев Ўзбекистон мустақиллигининг 34 йиллигига бағишланган тантанали маросимдаги нутқида мамлакатнинг саккиз йил ичида, яъни у лавозимга киришгани (2016 йил декабрь ойида)дан кейин эришилган ютуқларни кўрсатувчи кўплаб рақамлар ва фактларни санаб ўтди. Қуйида шу ҳақдаги иқтибосларни келтирамиз.

• Дунёдаги мураккаб вазиятга қарамасдан, Ўзбекистон иқтисодиёти 6 фоиздан юқори бўлган барқарор ўсиш суръатларини намойиш этмоқда. Мамлакат аҳолиси ҳар йили ўртача 700−800 минг кишига кўпаймоқда. Меҳнат бозорига ҳар йили 500−600 минг йигит-қиз кириб келмоқда.
• Сўнгги саккиз йилда мамлакат ялпи ички маҳсулоти 2 баробарга ўсиб, 2024 йилда 115 миллиард АҚШ долларига етди, экспорт ҳажми эса 26 миллиард долларни ташкил этди. Жорий йил якуни бўйича ЯИМ 130 миллиард долларга етади. Олтин-валюта захиралари мамлакат тарихида биринчи марта 48 млрд доллардан ошди. 130 млрд долларга яқин хорижий инвестициялар жалб қилинди.
• Жорий йилда 35 миллиард доллар инвестиция ҳисобига 9 мингга яқин янги корхона, хизмат кўрсатиш мажмуалари ташкил этилади. 1 сентябрь арафасида умумий қиймати 4 миллиард долларлик 79 та йирик объект фойдаланишга топширилди.
• Ўтган даврда кичик ва ўрта бизнес субъектлари сони 2 баробар кўпайди. Бугунги кунда ушбу тармоқда 10 миллиондан зиёд аҳоли меҳнат қилиб, даромад топмоқда.
• «Йил бошида 5,5 миллион аҳоли бандлигини таъминлаш бўйича катта марра олган эдик. Саккиз ойдаёқ 5 миллионлик режани уддаладик».
• «Ислоҳотларимизга ишониб, шу йилнинг ўзида четда ишлаётган 700 минг фуқаромиз юртимизга, ўз оиласи бағрига қайтди».
• Хорижий сайёҳлар сони йилдан-йилга ортиб бормоқда ва ўтган йили 10 миллиондан ошди, туризм хизматлари экспорти 3 миллиард доллардан ошди.
• Ўтган саккиз йилда мамлакатда электр энергияси истеъмолчилари сони 25 фоизга, яъни қўшимча 1,6 миллионга, истеъмол ҳажми 54 фоизга ёки қўшимча 25 миллиард киловатт соатга ошди. 2016 йилдан буён ишлаб чиқарилган электр энергияси ҳажми 59 миллиард киловатт соатдан 85 миллиард киловатт соатгача, келгуси йилда эса 97 миллиард киловатт соатгача етиши ҳисоб-китоб қилинган.
• Жорий йилнинг ўзида 6,5 миллиард кВт/соат «яшил» энергия ишлаб чиқарилди. Жами ишлаб чиқариш қувватларида унинг улуши 30 фоизга етди. 2030 йилгача Ўзбекистон яна 35 миллиард доллар тўғридан-тўғри инвестицияларни жалб қилади ва «яшил» энергия кўрсаткичини 54 фоизга етказади.
• Сўнгги саккиз йилда Ўзбекистонда 31 миллион квадрат метрдан зиёд ёки қарийб 12 мингта кўп қаватли уй-жой барпо этилгани — «тарихий қадам». Бу йил «Янги Ўзбекистон» ва бошқа массивларда яна 130 минг хонадонли замонавий уйлар қурилиб, фойдаланишга топширилади.
• «2030 йилгача бутун дунёда қўлланаётган „яшил шаҳар“ стандартлари асосида барча шаҳарларимизда яшиллик даражасини 30 фоизга етказамиз. Натижада мамлакатимиз барқарор энергия билан таъминланади, экологияга, одамларимиз саломатлигига зарарли таъсирлар кескин камаяди».
• «Ҳамроҳлик дастури»га мувофиқ, ота-она меҳридан маҳрум бўлган 11 минг нафар бола таълим, касб-ҳунар, спорт тизимига қамраб олинди. Эҳтиёжманд оилаларнинг 2,5 миллиондан зиёд аъзоларига 110 турдаги ёрдам ва хизматлар кўрсатиш йўлга қўйилди. 2025 йилнинг ўзида ёрдамга муҳтож аҳолини ижтимоий ҳимоя қилишга 19 триллион сўм маблағ йўналтирилди.
• «Камбағаллик даражасини 6,8 фоизга туширишга эришдик. Халқаро ташкилотлар 5−6 йил олдин ушбу рақамни 35 фоиз атрофида баҳолаганини ҳисобга олсак, қисқа даврда бу борада қандай катта йўлни босиб ўтганимиз яққол аён бўлади».
• «Сўнгги саккиз йилда хусусий сектор билан бирга боғчалардаги ўринларни 2,5 миллионга, қамровни 78 фоизга етказдик. Янги мактаблар қурганимиз, борларини кенгайтирганимиз ҳисобига қўшимча 1 миллионта ўқувчи ўрни яратилди».
• Олий таълимда қамров 9 фоиздан 42 фоизга етди. Талабаларнинг 53 фоизини қизлар ташкил этмоқда. Дунёнинг етакчи олий ўқув юртларида 2000 дан ортиқ ўзбекистонлик талаба таҳсил олмоқда, уларнинг 750 нафари «Эл-юрт умиди» жамғармаси орқали давлат ҳисобидан ўқимоқда. Ўтган йили Ўзбекистон ёшлари топ — 500 таликка кириш бўйича Марказий Осиёда 1-ўринни эгаллади.
• «Сўнгги йилларда тиббиёт учун маблағларни 6 карра оширдик, сифатли тиббий хизматларни маҳаллагача туширдик. Одамларимиз юқори технологик тиббий хизматлар учун олдин фақат пойтахтга келарди. Ҳозир бундай амалиётларнинг 400 дан ортиғи вилоят ва туманларнинг ўзида бажарилмоқда».
• Мамлакатда ўртача умр кўриш 73,8 ёшдан 75,1 ёшгача ошди.