«Ўзбекистон япон сайёҳлари учун жозибадор йўналишга айланмоқда» — Япония элчиси
Дипломатнинг таъкидлашича, Ўзбекистонда «япон халқи учун алоҳида қадрли бўлган қадимий Ипак йўлининг излари ҳамон кўзга ташланиб турибди». Сўнгги йилларда япониялик сайёҳлар оқими ортиб бораётган бўлса ҳам, Ўзбекистон ҳали япон жамоатчилигига етарлича таниш эмас.
Японияликларни нафақат муқаддас қадамжолар ва қадимий меъморий обидалар, балки ўзбек халқининг самимийлиги, меҳмондўстлиги ва очиқкўнгиллиги ҳам қизиқтиради. Тошкент, Самарқанд, Бухоро, Фарғона ва бошқа жойлар — уларнинг ҳар бири ўзига хос жозибага эга ва буларнинг барчаси, дипломатнинг сўзларига кўра, японларни ўзига жалб қилади.
2025 йилнинг январь-май ойларида Ўзбекистонга 10 минг нафар Япония фуқароси туризм мақсадида ташриф буюрган. Бу ўтган йилнинг мос даври билан солиштирилганда 3,5 минг нафарга ёки 53,2 фоизга кўпдир. 8900 киши ташриф мақсадини саёҳат сифатида кўрсатган, дея хабар бермоқда Миллий статистика қўмитаси. 2023 йил давомида Ўзбекистонга Япониядан 12 360 нафар сайёҳ ташриф буюрган бўлса, шундан 10 331 нафари дам олиш мақсадида мамлакатга келган.
«Япония ва Ўзбекистон ўртасида қадимий дўстлик мавжуд. Иккинчи Жаҳон урушидан кейин япон ҳарбийлари бу ерга келган. Уларнинг баъзилари инфратузилма қурилишига, жумладан, [Тошкентдаги] Навоий номидаги театрнинг қурилишига ҳисса қўшган. Бу ерда 800 га яқин киши вафот этган ва уларнинг қабрлари ҳали ҳам катта эҳтиром билан сақланмоқда. Яқинда Тошкентдаги музейда янги кўргазма очилди. У ерда япон ҳарбийларига оид қимматбаҳо буюмлар жамланган. Бу ҳам халқларнинг тарихий алоқаларини ёдга солувчи муҳим ташаббусдир», — деди Такеши Хатори.
2024 йил апрель ойида «Япония фуқароларининг 1940-йилларда Ўзбекистонда бўлгани ҳақидаги хотира экспозицияси» музейининг янги биноси очилиши ҳақида хабар берилганди. Gazeta музей билан танишган.
Элчи келгусида туризм, таълим ва технологиялар икки мамлакат ўртасидаги ҳамкорликнинг энг истиқболли йўналишларидан бири бўлишини таъкидлади. «Бугунги кунда кўплаб япониялик ёшлар Ўзбекистонга қизиқиш билдирмоқда. YouTube орқали саёҳат тажрибасини улашаётганлар сони кўпаймоқда. Бу туризм соҳасидаги салоҳиятни кўрсатади», — деди у.
Дипломат ўзаро манфаатли муносабатларни ривожлантиришнинг бошқа йўналишларини ҳам қайд этди: фойдали қазилмаларни қазиб олиш, энергетика, рақамли технологиялар ва стартаплар, «яшил энергетика».
«Ўзбекистоннинг Япония хусусий сектори инвестицияларига катта қизиқиш билдираётгани қувонарли. Япон компаниялари янги имкониятларни фаол равишда изламоқда. Катта истиқбол айнан бизнес ҳамжамиятлари фаолиятини қўллаб-қувватлашда. Таъкидлаш жоизки, Ўзбекистон иқтисодий ислоҳотларни жадаллик билан амалга оширмоқда. Давлат корхоналарини хусусийлаштириш, коррупцияга қарши курашиш, Жаҳон савдо ташкилотига аъзо бўлишга тайёргарлик булар жумласидан. Бу ташаббуслар Япония компанияларида қизиқиш уйғотмоқда», — деди Такеши Хатори.
«Ўзбекистонлик талабаларнинг Японияда стипендия асосида таълим олиши, қайтиб келгач, ўз мамлакатлари ривожига ҳисса қўшишлари муҳим».
«Ўзбекистоннинг Марказий Осиё марказида жойлашгани унга минтақавий ҳамкорлик учун муҳим имкониятларни беради. Президент қўшни давлатлар билан мунтазам учрашувлар ўтказиб, ўзаро ишончни мустаҳкамламоқда. Шу тариқа, Ўзбекистон етакчига айланмоқда. Бундан ташқари, мамлакатингизнинг ёш ва кўп сонли аҳолиси улкан имкониятдир. Бу нафақат иқтисодий ривожланиш, балки бутун минтақадаги тинчлик ва барқарорлик учун муҳим омилдир. Япония учун ҳам Ўзбекистон барқарор ва ишончли ҳамкор сифатида жуда зарур», — деди Япония элчиси.
Июнь ойида Gazeta Япониянинг Le One компанияси Ўзбекистонда биогаздан метан ишлаб чиқариш лойиҳасига 4 млн доллар, Sojitz компанияси эса Тошкентнинг янги аэропорти қурилишига 200 млн доллар сармоя киритиши ҳақида ёзганди.
26−27 август кунлари Япония ташқи ишлар вазири Такэси Ивая Ўзбекистонда бўлди. Ушбу мамлакат ТИВ матбуот котиби Китамура Тосихиро икки мамлакатнинг «яшил» трансформация, жумладан, декарбонизация, рақамлаштириш ва инсон ресурсларини ривожлантириш бўйича ҳамкорлигини мустаҳкамлаш режалари ҳақида гапирди.