«Ўзбекистон — 2030» стратегияси Хитойнинг «Бир макон, бир йўл» ташаббуси билан ўзаро боғланади

Ўзбекистон президенти Шавкат Мирзиёев ва Хитой раиси Си Цзиньпиннинг Пекин шаҳрида бўлиб ўтган музокаралари якунида қатор икки томонлама ҳужжатлар имзоланди. Бу ҳақда Ўзбекистон президенти матбуот хизмати хабар қилди.

Жумладан:

• «Ўзбекистон — 2030» стратегияси ва «Бир макон, бир йўл» ташаббусини ўзаро боғлаш бўйича ҳамкорлик дастури;
• Маданият марказларини ўзаро таъсис этиш тўғрисида битим;
• Тиббий хизматлар соҳасида ҳамкорлик тўғрисида битим.

Бундан ташқари, ташриф доирасида қуйидаги келишувлар ҳам имзоланди:

• Ўзбекистонга земснарядлар (техник кема) бериш лойиҳасининг иккинчи босқичини лойиҳалаштириш бўйича;
• техник-иқтисодий ҳамкорлик тўғрисида;
• мувофиқликни баҳолаш соҳасидаги ҳамкорлик тўғрисида;
• Ўзбекистондан Хитойга қовун ва бодом экспорт қилишда фитосанитария талаблари тўғрисида;
• космик фанлар, технологиялар ва космик фаолият натижаларидан тинчлик мақсадларида фойдаланишда ҳамкорлик қилиш тўғрисида;
• рақобат сиёсати соҳасидаги ҳамкорлик тўғрисида;
• инсон ресурсларини ривожлантириш соҳасида ҳамкорликни мустаҳкамлаш бўйича;
• рақамли иқтисодиёт соҳасидаги ҳамкорликни мустаҳкамлаш бўйича;
• Самарқанд вилояти ва Тяньцзинь шаҳри ўртасида шериклик муносабатларини ўрнатиш тўғрисида;
• Ўзбекистон Савдо-саноат палатаси ва Хитой Халқаро савдога кўмаклашиш кенгаши ўртасидаги ҳамкорлик тўғрисида.

Президент 2023 йил сентябрь ойида «Ўзбекистон — 2030» стратегиясини тасдиқлаган эди. Унинг мақсадлари барча фуқароларга салоҳиятни ривожлантириш учун имкониятлар яратиш, соғлом ва билимли авлодни тарбиялаш, кучли иқтисодиётни шакллантириш, адолат, қонун устуворлиги ва хавфсизликни кафолатли таъминлашдан иборат. Хитойнинг 2013 йилда бошланган «Бир макон, бир йўл» ташаббуси қуруқлик ва денгиз йўлларини ривожлантириш орқали давлатлараро ҳамкорлик механизмларини мустаҳкамлашга қаратилган.

Президент матбуот котиби Шерзод Асадов Gazeta’га берган изоҳида шундай деди: «Ўзбекистон президентининг Хитойга ташрифи доирасида имзоланган 14 ҳужжатдан иборат пакет, биринчи навбатда, мамлакатларимиз ўртасидаги савдо ва сармоявий ҳамкорликни янада кенгайтиришга қаратилган».

«Ўзбекистон — 2030″ стратегияси ва „Бир макон, бир йўл“ ташаббусини ўзаро боғлаш дастури транспорт, илм-фан, технологиялар, қишлоқ хўжалиги, энергия тежамкорлик ва соғлиқни сақлаш соҳаларида аниқ лойиҳаларни амалга оширишни рағбатлантириш бўйича комплекс ҳужжатдир», — деди у.

«Маҳсулотларни сертификатлаштириш тизимини бирхиллаштириш ва шунга мувофиқ товарнинг сифат стандартларига мувофиқлиги бўйича синов натижаларини тан олишни назарда тутувчи мувофиқликни баҳолаш соҳасидаги ҳужжат алоҳида имзоланди. Худди шу йўналишда миллий экспортимизни, хусусан, қовун ва бодомни экспорт қилишда фитосанитария талабларини соддалаштириш орқали Хитой бозорига олиб чиқишга қаратилган ҳужжатлар имзоланди», — деди Шерзод Асадов.

Бундан ташқари, трансчегаравий савдода инновацион ечимлар ва рақамли хизматларни қўллашни назарда тутувчи рақамли иқтисодиёт соҳасидаги битим имзоланди, дея қўшимча қилди у.