Шавкат Мирзиёев ва Владимир Путин Пекинда учрашди

Пекин шаҳрида 2 сентябрь куни Ўзбекистон ва Россия президентлари Шавкат Мирзиёев ва Владимир Путиннинг учрашуви бўлиб ўтди.

Ўзбекистон етакчиси матбуот хизматига кўра, суҳбат аввалида Владимир Путин ҳамкасбини ва Ўзбекистон халқини Мустақиллик куни билан табриклаган.

Томонлар аввалроқ бўлиб ўтган олий даражадаги мулоқотлар чоғида эришилган келишувларни амалга ошириш нуқтаи назаридан Ўзбекистон — Россия кенг қамровли стратегик шериклик ва иттифоқчилик муносабатларини янада кенгайтириш ҳамда мустаҳкамлаш масалаларини кўриб чиқди.

Савдо-иқтисодий ва инвестициявий ҳамкорлик суръатини сақлаб қолишга қаратилган мувофиқлаштирилган чора-тадбирларни қабул қилиш муҳим экани таъкидланди.

Давлат раҳбарлари иқтисодиётнинг устувор тармоқларида лойиҳаларни тайёрлаш ҳамда амалга оширишни жадаллаштириш, ҳудудлар ўртасида ва ташкил этилган қўшма саноат парклари доирасида кооперация алоқаларини рағбатлантиришга алоҳида эътибор қаратди.

Гуманитар соҳада, энг аввало, маданият, санъат, фан ва таълим йўналишларида самарали ҳамкорлик қилинаётгани қайд этилди. Улар, шунингдек, халқаро аҳамиятга молик масалалар юзасидан ҳам фикр алмашди.