Зеленский ва Мицотакис Украинага қишки энергия эҳтиёжларини қоплашга ёрдам бериш мақсадида суюлтирилган табиий газ импорт қилиш бўйича келишув имзолади
Украина президенти Владимир Зеленский ва Греция Бош вазири Кириакос Мицотакис Афинада Грециянинг DEPA Emporia компанияси ҳамда Украинанинг Naftogaz компанияси ўртасида АҚШ суюлтирилган газни етказиб бериш бўйича декларацияни имзолади. Мицотакиснинг таъкидлашича, мазкур келишув Украинани диверсификация қилинган ва ишончли энергия манбаларига тўғридан-тўғри боғлайди, Греция эса Марказий ва Шарқий Европага америкалик суюлтирилган газни етказиб берувчи муҳим марказга айланади.
Маълумотларга кўра, газ 2025-йил декабридан 2026-йил март ойигача етказилади. Бу айниқса Киевга кутилаётган қаттиқ қиш даврида барқарор энергия таъминотини таъминлаш мақсадида амалга оширилади. Греция ҳукумати манбалари келишувни минтақавий ва Европа энергетика хавфсизлигига қўшилган муҳим ҳисса сифатида баҳолаган. Грециянинг энергия инфратузилмаси бу жараёнда газнинг узлуксиз оқимини кафолатлайди.
Зеленский такидлашича, ушбу келишув Украинанинг Россия зарбалари натижасида қисқарган маҳаллий газ ишлаб чиқаришини қоплаш учун зарур бўлган қарийб 2 миллиард евро импорт харажатини таъминлаб беради. Келишув доирасида суюлтирилган газ аввал Ревитуса терминалида қайта газга айлантирилади ва кейин “Вертикал коридор” қувур тизими орқали Украинага йўналтирилади.
Октябр ойининг охирида Грециядан Украинaга газ ташиш учун махсус қувват маҳсулоти — “Йўналиш 1” ишга туширилган бўлиб, у Ревитуса LNG терминалидан бошланади. DESFA (Греция), Bulgartransgaz (Болгария), Transgaz (Руминия), VestMoldTransgaz (Молдова) ва GTSOU (Украина) операторлари ушбу маршрут бўйича мувофиқлашган ҳолда иш олиб бормоқда. Газ Болгария орқали Руминияга, у ердан Молдовага ва охир-оқибат Украинага етказилади.