Ўзбекистон ҳудудларида тадбиркорлик фаолияти кучаймоқда – Иқтисодий тадқиқотлар ва ислоҳотлар маркази
Ўзбекистон ҳудудларида тадбиркорлик фаолияти асосий кўрсаткичлар бўйича ўсиш тенденциясини намоён этмоқда.
Марказий Банк, Cолиқ ва Божхона қўмиталари ҳамда Республика товар-хомашё биржаси томонидан тақдим этилган тезкор маълумотларга асосланиб, Иқтисодий тадқиқотлар ва ислоҳотлар маркази таҳлилчилари ҳар ойда Ўзбекистон Республикасининг барча ҳудудларида тадбиркорлик фаолиятини ҳар томонлама таҳлил қилиб боради.
Божхона тўловлари бўйича тушумлар ҳам ўтган йилнинг мос даврига нисбатан 20%га ошди. Энг юқори ўсиш суръатлари Сирдарё вилоятида (81%) ва Қорақалпоғистон Республикасида (43%) кузатилди. Навоий, Тошкент, Наманган вилоятларида ҳамда Тошкент шаҳрида божхона тушумлари ўртача 25%га ошгани қайд этилди.
Ташқи иқтисодий кўрсаткичларни таҳлил қилиш натижаларига кўра, товарлар экспорти 14,3%га ўсди. Энг катта экспорт ўсиши Сурхондарё вилоятида (деярли 80%) ва Самарқанд вилоятида (39%) қайд этилди.
Шу билан бирга кредитлаш ҳажмларида ҳам сезиларли ўсиш кузатилди. Кўриб чиқилаётган даврда тижорат банклари томонидан ажратилган кредитлар ҳажми 2024 йилнинг шу даврига нисбатан 39,6%га ошди. Энг юқори ўсиш Сирдарё (+85,2%) ва Наманган вилоятларида (+51%) қайд этилди. Шунингдек, Бухоро ва Навоий вилоятларида, Тошкент шаҳрида кредитлаш суръатлари 40%дан ортиқни ташкил этди.
Ўзбекистон Республикаси товар-хомашё биржасида амалга оширилган битимлар ҳажми ўтган йилга нисбатан 23,4%га кўпайди. Биржа фаоллигининг ўсиши мамлакатнинг деярли барча ҳудудларида кузатилди, айниқса Қорақалпоғистон Республикасида фаоллик 38,5%га ошди. Шунингдек, Қашқадарё ва Бухоро вилоятларида биржа битимлари ҳажми ўртача 35% атрофида ўсиш қайд этди.
Султонмурод Озодов,
Иқтисодий тадқиқотлар ва ислоҳотлар маркази