Shaharsoz-2025: yosh me’morlarning g‘oyalari hayotga tatbiq etilmoqda — eng nufuzli talabalar mukofoti sovrindorlari e’lon qilindi
Bugun Toshkentda O‘zbekistonning yosh me’morlari, shaharsozlari va dizaynerlari uchun muhim voqea — talabalar me’morchilik mukofoti Shaharsoz — 2025 g‘oliblarini tantanali taqdirlash marosimi bo‘lib o‘tdi. Mukofot O‘zbekiston yosh me’morlar uyushmasi tomonidan UZUM milliy raqamli ekotizimi ko‘magida tashkil etilgan bo‘lib, u yana bir bor shuni isbotladiki: talabalar loyihalari shunchaki o‘quv topshiriqlari emas, balki shaharlarni rivojlantirish uchun haqiqiy manbadir.
Tanlov yakunlari: chizmadan shahar o‘zgarishlarigacha
Bu mavsumda respublika oliy ta’lim muassasalarida me’morchilik, shaharsozlik va dizayn yo‘nalishida o‘qiyotgan talabalardan 300 dan ortiq loyiha taqdim etildi. Hakamlar hay’ati loyihalarni shahar muhiti uchun dolzarbligi, barqaror rivojlanishga qo‘shgan hissasi, me’moriy yechimning o‘ziga xosligi va amalga oshirish imkoniyatlari (ayniqsa, «Uzum Mahalla» maxsus nominatsiyasi bo‘yicha) asosida baholadi.
Asosiy nominatsiyalar bo‘yicha g‘oliblar:
«Me’morchilik sohasidagi eng yaxshi bitiruv malakaviy ishi» — Malikova Dinara.
Loyiha zamonaviy me’moriy yondashuv, puxta o‘ylangan funksionallik va shahar muhiti ehtiyojlarini chuqur tushungan holda ajralib turadi. Yechim muallifning nafosatni amaliyot bilan uyg‘unlashtirish mahoratini namoyon etadi va real qurilish sharoitlariga samarali integratsiya qilinishi mumkin bo‘lgan konstruksiyani taklif qiladi.
«Kelajak shaharsozlik yechimi» — Rasuljonov Ilhomjon.
Loyiha barqaror rivojlanish, resurslardan oqilona foydalanish va aholining turmush sifatini oshirishga qaratilgan keng ko‘lamli shahar modelini taqdim etadi.
Hakamlar hay’atining maxsus mukofoti — Jumambetov Ulug‘bek.
Hakamlar hay’ati loyiha tadqiqotining chuqurligi va uning kelajak shaharsozlik yechimlariga ta’sir ko‘rsatish salohiyatini alohida e’tirof etdi.
«Uzum Mahalla» maxsus nominatsiyasi: hamkorlar eng yaxshi g‘oyalarni tanlaydi
UZUM milliy raqamli ekotizimi bilan hamkorlikda hakamlar hay’ati shahar infratuzilmasining qulayligi va mahalliy jamoat joylarini rivojlantirishga qaratilgan loyihalarni alohida ta’kidladi.
«Jamoat joylari» toifasi
G‘olib — Jo‘rayev Yusuf.
Loyiha jamoat hududini mahalliy o‘ziga xoslik va kundalik foydalanish ssenariylarini hisobga olgan holda uyg‘un obodonlashtirishni taklif qiladi.
Faxriy mukofotlar:
— Eshnazarov Jahongir
— G‘alautdinov Vakil
«Kichik me’moriy shakllar» toifasi
G‘olib — Komilova Mahdiya.
Loyiha mahallalarda qulay muhit va jozibador nuqtalar yaratishga xizmat qiluvchi kichik shakllarning funksionalligi va moslashuvchanligi bilan ajralib turadi.
Faxriy mukofot — Amanova Shahlo
Hamkor fikri
«Ishlar saviyasidan hayratlandik. Ayniqsa, ko‘plab loyihalarda mahalla konteksti hisobga olingani quvonarli — bu inson markazli shahar muhitini yaratish uchun ayni muddaodir. UZUM milliy raqamli ekotizimi eng yaxshi loyihalar mualliflarini qo‘llab-quvvatlashga va ularning g‘oyalarini amalga oshirishni muhokama qilishga tayyor», — dedi Mariya Skorik, UZUMning tashqi aloqalar va ijtimoiy loyihalar bo‘yicha direktori.
Tashkilotchilar so‘zi: mukofot vazifasi
O‘zbekiston yosh me’morlar uyushmasi rahbari, Britaniya me’morlari Qirollik institutining «Dunyoning 100 nafar ayol me’mori» ro‘yxatiga kiritilgan me’mor Taxmina Turdialiyeva shunday dedi:
«Bugun biz talabalar loyihalari “qog‘ozda qolmayotganini” ko‘ryapmiz — ular haqiqiy o‘zgarishlar uchun asosga aylanmoqda. Shaharsoz — 2025 yosh me’morlarning an’analar va innovatsiyalarni uyg‘unlashtira olishini, shahar muammolariga ilg‘or yechimlar taklif qila olishini yana bir bor namoyish etdi. Bizning vazifamiz — nafaqat eng yaxshilarni taqdirlash, balki bu g‘oyalar ro‘yobga chiqishi uchun oliy ta’lim muassasalari, biznes va mahalliy hokimiyatlar o‘rtasida mustahkam aloqalar yaratish».
Kelgusi mavsum uchun rejalar:
— tanlov geografiyasini kengaytirish;
— finalchilar uchun ustoz-shogird dasturini yo‘lga qo‘yish;
— UZUM bilan hamkorlikda g‘oliblarning ishlarini amalga oshirish bo‘yicha sinov loyihalarini boshlash.
«Yil universiteti»
Mukofot yakunlari bo‘yicha tashkilotchilar «Yil universiteti» deb Toshkent arxitektura-qurilish universitetini e’lon qildilar. Tanlov jarayonida universitetning faolligi, o‘tgan yil davomida talabalar uchun o‘tkazilgan qo‘shma ta’lim tadbirlari soni hamda ushbu oliy o‘quv yurti nomidan tanlovda ishtirok etgan talabalar miqdori inobatga olingan.
O‘tgan yillardagi yorqin loyihalar: yangi ishtirokchilar uchun ilhom
— «Kelajakning vertikal shahri» (Otabek Mahmudov)
— «Max Penson markazi» (Kumush Munavvarova)
— «Agrologistika majmuasi» (Farangiz Olimjonova va Otabek Vohidov)
Ta’lim dasturi: mutaxassislar hamjamiyati
Shaharsoz — 2025 doirasida Toshkent arxitektura-qurilish institutida 70 dan ortiq talaba ishtirokida me’morchilik viktorinasi o‘tkazildi. Ishtirokchilar o‘z g‘oyalarini ekspertlar va yetakchi me’morlik byurolari vakillari bilan muhokama qildilar.
«Mukofot men uchun kasbga kirishning boshlang‘ich nuqtasi bo‘ldi. Mutaxassislardan olingan fikr-mulohazalar va loyihani boshqa oliy ta’lim muassasalaridagi hamkasblar bilan muhokama qilish imkoniyati — bu bebaho tajribadir», — deya ta’kidladi 2025-yilgi mukofot sovrindori Malikova Dinara.
