Дунёнинг биринчи рақамли теннисчиси мураббийи билан ҳамкорликни тўхтатди
“Буни ёзиш мен учун жуда қийин. Етти йилдан ортиқ биргаликда ишлаганимиздан сўнг, Хуан билан ҳамкорлигимизни якунлашга қарор қилдик. Болаликдаги орзуларимни ҳақиқатга айлантирганинг учун раҳмат. Биз бу йўлни мен болалигимдаги орзуларим билан бошлаган эдик. У доимо менга яқин бўлди — корт ичида ҳам, ташқарисида ҳам.
Биз чўққига чиқишга муваффақ бўлдик ва мен ҳис қиламанки, бизнинг йўлларимиз айнан шундай ажралиши керак эди. Чунки мен шу жойдаман — биз эришишга интилган мақсад билан бирга. У мени нафақат спортчи, балки шахс сифатида ҳам тарбиялади. Бизнинг биргаликдаги ишимизни жуда қадрлайман. Энди иккимиз учун ҳам ўзгаришлар ва янги саргузаштлар, янги лойиҳалар даври бошланди. Лекин мен ишонаманки, биз ҳар доим ёрқин ғалабалар учун барча имкониятларимизни ишга соламиз. Сенга бутун қалбим билан энг яхшиларини тилайман. Мен хотиржамман, чунки биз бир-биримизга беришимиз мумкин бўлган нарсаларни бера олдик. Ҳаммаси учун раҳмат, Хуан!” — дея ёзди Алькарас ижтимоий тармоқлардаги саҳифасида.
2025 йилги мавсумда Карлос Алкарас иккита “Катта дубулға” турнирини ютди — Roland Garros ва АҚШ Очиқ чемпионати (US Open), шунингдек, учта Masters мусобақасида ғалаба қозонди (Монте-Карло, Рим ва Цинциннати) ҳамда учта ATP 500 тоифасидаги биринчиликда зафар қучди.
Аввалроқ, Алькарас уч йил ичида иккинчи бор Стефан Эдберг номидаги “Ҳалол ўйин” мукофотига сазовор бўлгани хабар қилинган эди.
Ушбу номинацияда Карлос канадалик Феликс Оже-Аляссим, болгариялик Григор Димитров ва норвегиялик Каспер Руудни ортда қолдирди. Номзодлар Халқаро теннис журналистлари ассоциацияси (ITWA) томонидан овоз бериш орқали аниқланган бўлиб, ғолиб илк бор дунёнинг амалдаги ва собиқ биринчи ракеткалари бўлган 29 нафар теннисчи томонидан танланган.
Манба: daryo.uz