«Ўзбекистон-2030» стратегиясидан «шиорлар» чиқариб ташланади
Бешта устувор йўналишни қамраб олган «Ўзбекистон — 2030» стратегияси икки йил аввал — 2023 йил кузида президент Шавкат Мирзиёевнинг фармони билан тасдиқланганди.
Тўрт кун аввал, 26 декабрь куни давлат раҳбари парламент ва халққа мурожаатида «эришилган улкан натижалар, янги устувор вазифалар „Ўзбекистон — 2030“ стратегиясини қайта кўриб чиқишни тақозо этмоқда» деганди.
Президент, хусусан, стратегияда Ўзбекистон ялпи ички маҳсулоти ҳажмини 2030 йилга бориб 160 миллиард долларга етказиш режалаштирилганини, бироқ бу маррага 2026 йилда эришиш режалаштирилганини, беш йил ичида эса бу кўрсаткич 240 миллиард долларгача ўсиши мумкинлигини таъкидлади.
Сешанба куни «Тараққиёт стратегияси» марказининг матбуот анжуманида таъкидланганидек, глобал иқтисодиёт ва халқаро муносабатлардаги тенденциялар, жаҳон бозорларидаги тебранишлар, иқлим ўзгариши, энергия бозорларининг трансформацияси, рақамли технологиялар ва сунъий интеллектнинг ривожланиши, шунингдек, ўсиб бораётган аҳолининг ўзгарувчан эҳтиёжлари янги ечимларни талаб қилмоқда.
Янгиланган стратегия лойиҳаси 350 дан ортиқ давлат органи ва илмий марказлар вакилларини ҳисобга олган ҳолда ишлаб чиқилди, улар амалдаги стратегиянинг 444 та самарадорлик кўрсаткичларининг ҳар бирини баҳолади, дейилади хабарда.
«Шиорлардан воз кечиш»
«Тараққиёт стратегияси» марказининг таъкидлашича, тайёрланган лойиҳа бир нечта хусусиятларга эга.
Биринчидан, барча кўрсаткичлар «ҳар бир инсон ва оила ҳаётида сезилиши» керак бўлган янги мақсадларни ҳисобга олган ҳолда қайта кўриб чиқилди ва тўлдирилди.
Иккинчидан, барча кўрсаткичлар ўлчанадиган, яъни рақамларда ифодаланадиган бўлди, баҳолаш ёки ўлчаш мумкин бўлмаган, умумий вазифалар, топшириқлар ва шиорларни ифодаловчи кўрсаткичлар чиқариб ташланди (улар 130 та эди), дея таъкидлади марказ.
Учинчидан, барча кўрсаткичларнинг бажарилиши йиллар бўйича амалга оширилиши белгиланди, бу эса ҳар бир йил учун тараққиётни кузатиш имконини беради.
Тўртинчидан, ҳар бир вазирлик ва идора бўйича (60 га яқин) самарадорлик кўрсаткичлари белгиланди.
Бешинчидан, ҳужжатда ҳар бир кўрсаткичга эришиш учун зарур бўлган аниқ молиялаштириш манбалари кўрсатилди.
Олтинчидан, лойиҳада тармоқлар, соҳалар ва ҳудудларни ривожлантиришнинг барча концепция ва стратегиялари «Ўзбекистон — 2030» стратегиясига мувофиқ бўлиши белгиланмоқда. Лойиҳа иловасида 50 дан ортиқ шундай ҳужжат (4 та концепция, 38 та соҳа ва тармоқни ривожлантириш стратегияси, 14 та ҳудудни ривожлантириш стратегияси) номлари келтирилади.
Стратегиянинг самарадорлик кўрсаткичларига эришиш яна барча давлат органлари ва ташкилотларининг устувор вазифаси этиб белгиланади.