Ҳиндистон бош вазири 29−30 август кунлари Ўзбекистонга давлат ташрифи билан келади

Ҳиндистон бош вазири Нарендра Моди президент Шавкат Мирзиёевнинг таклифига биноан 29−30 август кунлари Ўзбекистонга давлат ташрифи билан келади. Бу ҳақда Ҳиндистон Ташқи ишлар вазирлиги матбуот хизмати хабар берди. Бу Нарендра Модининг Ўзбекистонга тўртинчи ташрифи бўлади.

Ташриф давомида Ҳиндистон бош вазири Ўзбекистон Президенти билан музокаралар ўтказади. «Раҳбарлар савдо ва инвестициялар, мудофаа, рақамли ўзаро боғлиқлик, энергетика, таълим ва гуманитар алоқалар соҳаларидаги ҳамкорликни кўриб чиқади, шунингдек, келгусидаги ҳамкорлик кун тартибини белгилаб олади», — дейилади хабарда.

Шунингдек, улар «Ривожланган Ҳиндистон — 2047» (Viksit Bharat 2047) ва «Ўзбекистон — 2030» концепцияларида назарда тутилган умумий тараққиёт мақсадларини илгари суриш бўйича фикр алмашади.

Нарендра Моди, шунингдек, Тошкентдаги Шастри ҳайкали ҳамда Тошкент давлат шарқшунослик университети ҳузуридаги Маҳатма Ганди марказига ташриф буюриши кутилмоқда.