Ўзбекистонлик велоспортчилар “ASEAN Track Series” мусобақасида 4 та медальни қўлга киритишди

Малайзиянинг Нилай шаҳрида велотрек бўйича “ASEAN Track Series” халқаро мусобақасининг биринчи босқичи якунланди. Миллий олимпиада қўмитасининг ахборотига қўра унда иштирок этган Ўзбекистон терма жамоаси 4 та медаль билан мусобақани тугатди.

Мусобақа натижаларига кўра, терма жамоа аъзоси Сергей Ростовцев учта йўналишда чемпионликни қўлга киритиб, 3 та олтин медалга сазовор бўлди. У омниум, скретч ҳамда элиминация баҳсларида барча рақибларини ортда қолдирди.

Аёллар ўртасида ўтказилган элиминация йўналишида эса Нафосат Козиева бронза медални қўлга киритди.
Қайд этилишича, “ASEAN Track Series” мусобақасининг иккинчи босқичи 10–11 январь кунлари Малайзиянинг Нилай шаҳрида ўтказилади. Ўзбекистонлик велоспортчилар мазкур босқичда ҳам иштирок этишлари маълум қилинган.