“Тўсиқсиз туризм”ни амалга оширишда транспорт инфратузилмасини мослаштириш асосий масала

Ўзбекистон Республикасида ногиронлиги бўлган сайёҳлар учун қулай инфратузилма яратиш “тўсиқсиз туризм”ни ривожлантиришнинг муҳим йўналишларидан бири сифатида белгиланган. Ушбу ёндашув туризм соҳасида имкониятларни кенгайтириш билан бирга, ижтимоий адолат ва тенгликни таъминлашга ҳам хизмат қилмоқда дейилади Туризм қўмитасининг маълумотида.

Сўнгги йилларда мамлакатда туризм инфратузилмасини модернизация қилишга алоҳида эътибор қаратилмоқда. Жумладан, тарихий обидалар, музейлар, меҳмонхоналар ва транспорт тизимларида ногиронлиги бўлган шахслар учун мослаштирилган шарт-шароитлар жорий этилмоқда.

“Тўсиқсиз туризм” концепциясини амалга оширишда транспорт инфратузилмасини мослаштириш асосий масалалардан бири ҳисобланади. Шаҳарларда жамоат транспортида махсус рампалар, кенгайтирилган эшиклар ва аниқ белгилар орқали хавфсиз ҳаракатланиш имкониятлари яратилмоқда. Аэропортлар ва темир йўл вокзалларида лифтлар, ёрдамчи қурилмалар ўрнатилиб, хизмат кўрсатувчи ходимлар малакасини оширишга эътибор қаратилмоқда.

Туризм объектларида ҳам кириш имконияти стандартларини жорий этиш муҳим аҳамият касб этмоқда. Музейлар, тарихий ёдгорликлар ва дам олиш масканларида махсус йўлаклар, мослаштирилган инвентар ва аудиогидлар орқали ногиронлиги бўлган сайёҳлар учун тўлиқ маданий ва тарихий тажриба яратиш кўзда тутилган. Бу чоралар мамлакатнинг умумий туризм салоҳиятини оширишга хизмат қилмоқда.

Ахборот технологияларидан фойдаланиш ҳам “тўсиқсиз туризм”ни ривожлантиришда муҳим ўрин тутади. Мобил иловалар ва веб-сайтлар орқали ногиронлиги бўлган сайёҳлар учун мос объектлар, транспорт йўналишлари ва хизматлар ҳақида олдиндан маълумот олиш имконияти яратилмоқда. Бу эса саёҳатни режалаштиришни енгиллаштириб, Ўзбекистонни инклюзив ва барча учун очиқ туризм маскани сифатида шакллантиришга хизмат қилмоқда.