Самарқанд вилояти Пайариқ туман тиббиёт муассасасида янги туғилган чақалоқ жасади топилгани юзасидан тергов бошланди

«Севимли» телеканалида эфирга узатиладиган «Замон» кўрсатувида хабар қилинишича, 27 декабрь куни ёш аёл туман тиббиёт бирлашмасига ич қотиши шикояти билан мурожаат қилган. У қайнонаси билан бирга келган бўлса-да, шифокор кўригидан ва УЗИ текширувидан ўтишдан бош тортган ҳамда фақат клизма қилинишида туриб олган.

Муолажа вақтида аёл ҳамширадан уни ёлғиз қолдиришни сўраган ва шундан сўнг шифохонани сезилмасдан тарк этган. Кейинчалик тиббиёт муассасаси ходимлари хоналарини текшириш жараёнида ҳожатхонанинг ахлат қутиси ичида янги туғилган ўғил боланинг жасадини аниқлаган.

Аёлнинг шахси видеокузатув камералари орқали аниқланиб, маълумотлар ҳуқуқни муҳофаза қилувчи органларга етказилган. Суд-тиббий экспертиза тайинланган, дастлабки текширув ишлари олиб борилмоқда.