Бензин ишлаб чиқарилиш ҳажми оширилади ва нархлар асоссиз равишда оширишлишига йўл қўйилмайди — Энергетика вазирлиги

Совуқ ҳаво оқими сабабли автотранспорт воситаларига газ тўлдириш компрессор шохобчалари фаолиятига қисқа муддатли чекловлар киритилиши муносабати билан “Ўзбекнефтгаз” акциядорлик жамияти биржа савдоларига чиқарилаётган кунлик автобензин ҳажмини талабдан келиб чиққан ҳолда оширади.

Маълум қилинишича, ушбу чора метан ёқилғиси таъминотидаги вақтинчалик чекловлар шароитида истеъмолчиларнинг автобензинга бўлган эҳтиёжини тўлиқ қондириш мақсадида кўрилмоқда. Бунинг учун республика ҳудудларида етарли миқдорда ёқилғи захиралари шакллантирилган.

Истеъмолчиларни автобензин билан барқарор таъминлаш масаласи давлат назоратига олинган бўлиб, ушбу йўналишда барча зарур чора-тадбирлар амалга оширилмоқда.

Шу билан бирга, хусусий автойўқилғи қуйиш шохобчалари фаолияти ҳам кучайтирилган тартибда назорат қилинади. Ваколатли органлар томонидан нархларни асоссиз равишда ошириш, ёқилғини сифат ва миқдор талабларига риоя этмасдан сотиш ҳолатларига йўл қўйилмаслиги қатъий таъминланиши қайд этилди.