Молдова МДҲдан чиқиш жараёнини бошлади

Молдова ҳукумати мамлакатнинг Мустақил Давлатлар Ҳамдўстлиги (МДҲ)даги аъзолигини тугатиш бўйича ҳуқуқий жараённи бошлади. Бу ҳақда 19 январь куни Radio Moldova эфирида мамлакат ташқи ишлар вазири ва вице-премьер Михай Попшой маълум қилди.

Унинг сўзларига кўра, Молдованинг МДҲдаги аъзолигига асос бўлиб хизмат қилувчи учта асосий келишувни денонсация қилиш режалаштирилган. Гап 1993 йил 22 январда Минскда имзоланган МДҲ Устави, 1991 йил 8 декабрда тузилган МДҲни ташкил этиш тўғрисидаги келишув ҳамда ушбу ҳужжатга 1991 йил 22 декабрда қабул қилинган илова ҳақида бормоқда.

Михай Попшой таъкидлашича, мазкур келишувлар бекор қилинганидан сўнг Молдова расман ва юридик жиҳатдан МДҲ таркибидан чиққан ҳисобланади. Шу билан бирга, унинг айтишича, мамлакатнинг де-факто аъзолиги аллақачон маълум вақт аввал тўхтатилган.

Вазирнинг маълум қилишича, денонсация жараёни аллақачон бошланган ва тегишли ҳужжатлар парламентнинг навбатдаги сессиясининг илк кунларида кўриб чиқилади. Давлат ахборот агентлиги «Молдпресс» келтирган маълумотларга кўра, февраль ойи ўртасигача ҳукумат даражасидаги барча расмий тартиб-таомиллар якунланиши, шундан сўнг қарор парламент томонидан қабул қилиниши кутилмоқда.

Михай Попшой Молдованинг МДҲ билан боғлиқ келишувлардан чиқишини мамлакатнинг Европа Иттифоқига йўналтирилган сиёсатини мустаҳкамлаш йўлидаги муҳим қадам сифатида баҳолади.

Қайд этилишича, Молдова МДҲ доирасида жами 283 та келишувни имзолаган. Ҳозирга қадар уларнинг 71 таси денонсация қилинган, яна тахминан 60 та келишув бекор қилиш жараёнида турибди. Шу билан бирга, расмий Кишинёв иқтисодий фойда келтирадиган ёки фуқаролар учун амалий аҳамиятга эга бўлган келишувлардан, агар улар мамлакатнинг Европа йўналишига зид келмаса, воз кечишни режалаштирмаётганини маълум қилди.