Арман Сарукян: “Гетжи билан жанг қиламан, Топурия ярим ўрта вазнга кўтарилади”

Енгил вазн тоифасида UFC рейтингида биринчи ўринни эгаллаб турган арманистонлик жангчи Арман Сарукян кейинги жангини енгил вазн (70 кг) тоифасида UFC'нинг вақтинчалик чемпиони, америкалик Жастин Гетжига қарши ўтказишни истаётганини маълум қилди.

“Мен Жастин билан жанг қилишни жуда хоҳлайман, чунки у UFC'нинг вақтинчалик чемпиони ҳисобланади. Агар Илия бу йил жанг қила олса, унда улар ўзаро тўқнаш келишади. Агар Топурия апрель ёки июн ойларида у билан жангни қабул қилмаса, мен Гетжи билан жанг қилишни хоҳлайман. Акс ҳолда, менда кутишдан бошқа чора қолмайди. Мен нима қила оламан? Чемпионлик учун ўз имкониятимни кутишим керак. Ўтган йили менда шундай имконият бор эди, аммо жанг қила олмадим. Кутишим керак, шунда менга бу имконият берилади. Ўйлайманки, мен Гетжи билан жанг қиламан, Топурия эса Махачев билан жанг қилиш учун ярим ўрта вазн тоифасига кўтарилади. Бу шунчаки менинг тахминим”, деди Сарукян.

АҚШнинг Лас-Вегас шаҳрида ўтказилган 2026-йилнинг илк рақамли турнири — UFC 324 мусобақасининг асосий жангида UFC енгил вазн тоифасида вақтинчалик чемпионлик камари учун америкалик Жастин Гетжи ва англиялик Педди Пимблетт ўзаро баҳс олиб борди.

Беш раундга мўлжалланган жанг тўлиқ давом этди ва унда Жастин Гетжи ғалаба қозонди. Жанг якунида ҳакамлар 48:47, 49:46 ва 49:46 ҳисобларида 37 ёшли америкалик жангчининг устунлигини қайд этди.

Шу тариқа, Гетжи навбатдаги жангини UFC енгил вазн тоифаси чемпиони, грузиялик Илия Топурияга қарши ўтказади.