Америкалик тоғ чанғичи Олимпиадада жиддий жароҳат олиб мусобақани тарк этди

Америкалик тоғ чанғичи Линдси Вонн ушбу спорт туридаги энг муваффақиятли спортчилардан бири ҳисобланади. У январь ойининг охирида Жаҳон кубоги босқичида олган жароҳатига қарамай, Италияда ўтказилаётган мусобақаларда қатнашишга қарор қилган эди. Бироқ Олимпиада доирасидаги тезлик билан тушиш баҳсининг илк сонияларидаёқ 41 ёшли Вонн йиқилиб, жароҳат олди. У трассадан вертолётда олиб кетилди.

Линдси Вонн тезлик билан тушиш мусобақасини 13-рақам остида бошлаган. 13-сонияда у тўсинлардан бирига тегиб кетиб, мувозанатини йўқотган ва йиқилган.

Протокол талабига мувофиқ, Вонн трассадан вертолётда эвакуация қилинди. Томошабинлар уни олқишлар билан кузатишди. Ҳозирча спортчининг соғлиғи ҳақида расмий маълумот берилмаган.

Мазкур трассада Вонндан кейин яна икки нафар спортчи — австриялик Нина Ортлиб ва андорралик Канде Морено ҳам йиқилди. Ортлиб трассани ўзи тарк этган бўлса, Морено Вонн сингари вертолётда олиб кетилди.

Мусобақада ғалабани Бризи Жонсон қўлга киритиб, АҚШ учун ушбу Олимпия ўйинларидаги илк олтин медални тақдим этди. Кумуш медал германиялик Эмма Айхерга, бронза эса италиялик София Гожжага насиб этди. Нейтрал байроқ остида иштирок этган россиялик спортчи Юлия Плешкова 22-ўринни эгаллади.

Линдси Вонн аввал ҳам бир неча бор Кортина д’Ампеззо трассасида муваффақиятли чиқишлар қилган. Хусусан, 2004 йилда айнан шу ерда у Жаҳон кубоги босқичида илк бор шоҳсупага кўтарилиб, учинчи ўринни эгаллаган. Умуман олганда, Вонн ушбу трассада Жаҳон кубоги доирасида 12 марта олтин медални қўлга киритган.

Милано ва Кортина д’Ампеззода ўтаётган Олимпия ўйинлари 41 ёшли спортчи учун сўнгги Олимпиада бўлиши керак эди. Линдси Вонн аввал ҳам икки бор спортчилик фаолиятини якунлашга уринган. У 2024 йилда, тиззасини алмаштириш бўйича жарроҳлик амалиётидан сўнг беш йиллик танаффусдан кейин катта спортга қайтган эди.

Манба: daryo.uz