Ўзбекистонда метан заправкалари одатий тартибда қайта ишлашни бошлайди

11 февраль куни соат 09:00 дан бошлаб Ўзбекистоннинг барча ҳудудларида метан автогаз тўлдириш шохобчалари босқичма-босқич одатий иш режимига қайтарилади. Бу ҳақда Энергетика вазирлиги маълум қилди.

Қайд этилишича, метан заправкалари Фарғона водийси вилоятларини ҳам қамраб олган ҳолда иш фаолиятини тиклайди. Шохобчаларнинг ишга туширилиши босқичма-босқич амалга оширилиб, ҳудудларда газ таъминоти барқарорлашгани сари тўлиқ иш режимига ўтилади.

Мазкур қарор автотранспорт воситалари учун метан ёқилғиси билан таъминлашни яхшилаш ҳамда аҳоли ва ҳайдовчиларга қулайлик яратиш мақсадида қабул қилингани билдирилди.