Дана Уайт Оқ уйдаги UFC турнири жанглар рўйхати шакллантирилганини маълум қилди

UFC промоушени раҳбари Дана Уайт 14-июнь куни АҚШ пойтахти Вашингтонда, Оқ уйда ўтказилиши режалаштирилган турнир учун жанглар рўйхати (кард) тўлиқ шакллантирилганини эълон қилди. Лас-Вегасда бўлиб ўтган “Зуффа Бохинг 3” турниридан кейинги матбуот анжуманида Уайт ушбу тадбир бўйича тайёргарлик ишлари якунланганини тасдиқлади.

“Номзодлар кўп бўлишига қарамай, турнир учун рақибларни танлаш ва жуфтликларни шакллантириш жараёни аллақачон якунланди. Оқ уйдаги турнир карди устидаги ишларни ўтган ҳафтада тугатдик. Нечта титул жанги бўлиши ҳақида эса ҳозирча ҳеч нарса демайман”, дея таъкидлади Дана Уайт.

Мазкур турнир спорт оламида катта қизиқиш уйғотмоқда, боиси бу даражадаги мусобақанинг АҚШ президенти қароргоҳида ўтказилиши тарихий воқеа ҳисобланади. Дастлаб турнир АҚШ мустақиллигининг 250 йиллиги муносабати билан 4-июль санасига режалаштирилгани қайд этилган эди. Бироқ логистика масалалари инобатга олиниб, тадбир 14-июнь санасига кўчирилди.