“Чиройли ғалабага тайёрман” — Бектемир Мелиқўзиев ганалик рақибга қарши жанг ҳақида
“Авваламбор, ушбу бокс кечасида менга жанг қилиш имконияти берилганидан жуда хурсандман. Олдинда турган беллашувга мураббийларимиз ва жамоамиз билан яхши тайёргарлик кўрдик. Худо хоҳласа, чиройли ғалабага эришиб, барча мухлисларимизни, бутун ўзбек халқини хурсанд қилишга тайёрман. Рақибнинг мен ҳақимда билдирган фикрларига муносабатим шуки, ким кучлироқ экани рингда кўринади, дейди Мелиқўзиев”.
Ўзбекистонлик боксчининг рақиби “безори” (Мелиқўзиевнинг профессионал боксдаги лақаби — Bek Bully)жангчини безорилик билан мағлуб этишини таъкидлаган эди.
Маълумот учун, Бектемир Мелиқўзиев 2026 йил 22 февраль куни тонгда АҚШнинг Лас Вегас шаҳрида ташкил этиладиган профессионал бокс оқшомининг асосий кардида рингга чиқади. Ушбу жангда унга Гана вакили Сена Агбеко (29–4) рақиб бўлади.
Оқшомнинг марказий жанги ярим ўрта вазн тоифасида WBC чемпиони Марио Барриос ва собиқ жаҳон чемпиони Раян Гарcиа ўртасида ўтказилади.
Бектемир Мелиқўзиев сўнгги бор 2025 йил 25 май куни WBA Элиминатор камари учун америкалик Дарюс Фулгҳемга қарши рингга кўтарилган. 12 раундлик жанг тўлиқ давом этиб, унда Мелиқўзиев очколар ҳисобига кўра (114–112, 114–112, 114–112) ғалаба қозонган.
Айни пайтда Бектемир Мелиқўзиев WBA йўналиши бўйича чемпионлик камари учун мажбурий даъвогар ҳисобланади. Бироқ ташкилот ҳозирча унинг WBA Супер чемпионлик камари соҳиби Армандо Ресендизга қарши жангига расмий буйруқ бермаган.
29 ёшли Мелиқўзиев профессионал фаолияти давомида ҳозирга қадар 17 та жанг ўтказиб, 16 та ғалаба ва 1 та мағлубият қайд этган. У 10 та жангда рақибларини муддатидан аввал мағлуб этган. 33 ёшли Сена Агбеко ҳисобида эса 29 та ғалаба ва 4 та мағлубият мавжуд.
Манба: daryo.uz