Ўзбекистон Республикаси Вазирлар Маҳкамасининг 2025 йил 24 ноябрдаги 738-сон қарори ижросини таъминлаш мақсадида “Фармацевтика маҳсулотлари хавфсизлиги маркази” давлат муассасаси дори воситалари ва тиббий жиҳозларни давлат рўйхатидан ўтказиш жараёнида муҳим ўзгаришлар жорий этилишини маълум қилди.

Қайд этилишича, дори воситалари ва тиббий жиҳозларни давлат рўйхатидан ўтказиш, рўйхатдан ўтказилганлик гувоҳномасининг амал қилиш муддатини узайтириш ҳамда унга ўзгартиш ва қўшимчалар киритиш бўйича барча янги аризалар 2026 йил 26 февралдан бошлаб Вазирлар Маҳкамасининг 738-сон қарори талабларига мувофиқ кўриб чиқилади.

Мазкур қарор билан дори воситалари ва тиббий жиҳозларни давлат рўйхатидан ўтказиш тартибининг янги таҳрири тасдиқланган бўлиб, у 2026 йил 26 февралдан кучга киради.

Шу муносабат билан, Вазирлар Маҳкамасининг 2018 йил 23 мартдаги 213-сон қарори амал қилган даврда расмийлаштирилган, аммо ҳозирги кунга қадар тўлови амалга оширилмаган (маблағ келиб тушмаган) аризалар бўйича тўловларни 2026 йил 26 февралга қадар амалга ошириш зарурлиги таъкидланди.

Иш жараёнининг узлуксизлигини таъминлаш ва эҳтимолий тушунмовчиликларнинг олдини олиш мақсадида тўлов амалга оширилаётганда тўлов варақасининг рақами ва санасини тўлиқ ҳамда аниқ кўрсатиш талаб этилади.

Шунингдек, 2026 йил 26 февралдан бошлаб дори воситалари ва тиббий жиҳозларни давлат рўйхатидан ўтказиш бўйича янги аризалар “Дормон” ахборот тизими орқали 738-сон қарор талабларига мувофиқ тақдим этилиши белгиланди.