Президент Самарқанддан Нарпай туманига янги Hyundai Rotem тезюрар поездида етиб келди
Поезд буюк саркарда Жалолиддин Мангуберди номи билан аталган бўлиб, у Ўзбекистонга келтирилиши режалаштирилган олтита «Hyundai Rotem» таркибидан биринчисидир. Таркиб етти вагондан иборат бўлиб, соатига 260 километргача тезликда ҳаракатлана олади.
Оқ рангдаги поезд тонировка қилинган ойнаси ҳамда Ўзбекистон байроғини эслатувчи кўк, яшил ва қизил рангли чизиқлар билан безатилган. Шунингдек, унда «Jaliloddin Manguberdi» ёзуви жойлаштирилган. Поезд узунлиги 175 метрни ташкил этиб, тахминан 390 нафар йўловчини қабул қила олади. Йўловчилар учун VIP, бизнес ва иқтисод тоифалари назарда тутилган.
Мазкур поезд Ўзбекистоннинг иқлим шароитларини ҳисобга олган ҳолда ишлаб чиқилган. У чанг, юқори ва паст ҳароратлар ҳамда қум бўронларига чидамли махсус тизимлар билан жиҳозланган бўлиб, узоқ масофали йўналишлар учун мўлжалланган.
Яқин вақтларда «Жалолиддин Мангуберди» поезди Тошкент — Ургенч — Хива йўналишида ҳаракатни бошлаши кутилмоқда. Сафар вақти тахминан етти соатни ташкил этади.