Жавоҳир Синдаров: «Имконият бўлса, доим рақибга босим ўтказишга ҳаракат қиламан»

Номзодлар турнирининг 8-турида ҳамюртимиз Жавоҳир Синдаров россиялик гроссмейстер Андрей Есипенко билан дуранг қайд этди. Партиядан сўнг у ўз фикрлари билан ўртоқлашди.

Синдаровнинг таъкидлашича, у ўйинга жиддий тайёргарлик кўрган:

“Рақибимдан каталонча бошланишга ўхшаш вариант кутгандим. Дебютдан кейин тайёргарлигимдаги позиция юзага келди ва у менга ёқа бошлади. Андрей узоқ ўйлади. Бир пайт тушундимки, агар пиёда қурбон қилмасам, шунчаки бироз устунликка эга, лекин чўзилган ўйин бўлади. Шу туфайли ташаббус учун пиёда қурбон қилдим”.

Унинг фикрича, қурбонликдан кейин позиция анча қулай бўлган:

“Ўша вазият менга жуда ёқди. Умуман олганда, бугунги натижани яхши деб баҳолайман”.

Дуранг натижа унинг ўйинига таъсир қиладими, деган саволга Синдаров қуйидагича жавоб берди:

“Олдин ҳам дуранглар бўлган. Мен учун энг муҳими сифатли шахмат ўйнаш. Имконият пайдо бўлса, ҳар доим рақибга босим қилишга ҳаракат қиламан”.

Шунингдек, у партия олдидан футболчи Давид Луиз томонидан биринчи юриш амалга оширилганини ҳам эслаб ўтди:

“Мен ҳам, Андрей ҳам футбол мухлисимиз. Бундай меҳмонлар келганда жуда хурсанд бўламан”.

Манба: https://t.me/uzchesss