Президент Қўқондан Марғилонга Фарғона водийсида янги йўлга қўйилган электропоездда келди

Фарғона водийсида Қўқон, Наманган, Андижон ва Марғилон шаҳарларини боғловчи янги электропоезд қатнови йўлга қўйилди. Шавкат Мирзиёев жамоатчилик вакиллари билан бирга ушбу йўналишдаги илк поездда Қўқон шаҳридан Марғилон шаҳрига келди, дея хабар қилди Президент матбуот хизмати.

Мазкур лойиҳа президентининг 2025 йил 27 декабрдаги «2030 йилга қадар темирйўл транспортида маҳаллий йўналишларда йўловчи ташиш кўрсаткичларини ошириш чора-тадбирлари тўғрисида»ги қарори ижроси доирасида амалга оширилган.

Темирйўл узунлиги 324 километрни ташкил этади. Янги поезд Тошкент йўловчи вагонларни қуриш ва таъмирлаш заводида ишлаб чиқарилган. Олти вагондан иборат, 586 ўринли поезд соатига 120 километргача тезликда ҳаракатлана олади.

Чипта нархи 15 минг сўм этиб белгиланган.

«Бу автомобиль транспортига нисбатан анча арзон ва қулайдир. Кунига 1,5 минг, йилига қарийб 600 минг нафар йўловчига хизмат кўрсатиш имконияти ҳудудда иқтисодий фаолликни оширишга хизмат қилади», — дейилади хабарда.

Қайд этилишича, вагонларда иқлим назорати тизими ва кондиционерлар ўрнатилган. Бепул Wi Fi, гаджетлар учун USB портлар мавжуд. Ногиронлиги бўлган шахслар учун махсус кўтаргичлар, кенг жойлар ва мослаштирилган ҳожатхоналар кўзда тутилган. Велосипедларни ташиш учун маҳкамлагичлар ҳам бор.

Таъкидланишича, вагонлардаги видеокузатув ва зарба кучини камайтирувчи крэш-тизимлар халқаро хавфсизлик стандартларига мос келади.

Йўл давомида президент вилоят фаоллари билан ҳудудда рўй бераётган ўзгаришлар ҳақида суҳбатлашди.

Янги темирйўл ҳалқаси Фарғона водийсининг туризм салоҳиятини ҳам янги босқичга олиб чиқиши таъкидланди. Бекатлар атрофида хизмат кўрсатиш шохобчалари, меҳмонхоналар ва умумий овқатланиш масканларини ташкил этиш зарурлиги, бу маҳаллий аҳоли учун қўшимча даромад манбаини яратиши қайд этилди.