Ўзбекистоннинг БААдаги янги элчиси Умид Шодиев ўз фаолиятини бошлади

Ўзбекистоннинг Бирлашган Араб Амирликларидаги янги тайинланган элчиси Умид Шодиев БАА ташқи ишлар вазири ўринбосари Умар Убайд ал Шамсийга ишонч ёрлиқлари нусхаларини топширди. Бу ҳақда «Дунё» ахборот агентлиги хабар қилди.

Учрашув чоғида томонлар икки мамлакат ўртасидаги сиёсий, савдо-иқтисодий ҳамда маданий-гуманитар соҳалардаги ҳамкорликнинг бугунги ҳолати ва уни янада ривожлантириш истиқболларини муҳокама қилди.

Умар ал-Шамсий янги элчини лавозимга тайинлангани билан табриклаб, унга дипломатик фаолиятида муваффақият тилади. Шу билан бирга, у БАА ва Ўзбекистон ўртасидаги муносабатларни барча йўналишларда кенгайтиришга тайёрлигини билдирди.

Ўз навбатида, Умид Шодиев икки давлат ўртасидаги анъанавий дўстона муносабатларни янада мустаҳкамлаш учун барча саъй-ҳаракатларини ишга солишини таъкидлади.

Умид Шодиев 43 ёшда. У Жаҳон иқтисодиёти ва дипломатия университетини тамомлаган. Дипломатик фаолиятини 2005 йилда Ташқи ишлар вазирлиги тизимида референт сифатида бошлаган ва кейинчалик турли лавозимларда ишлаган. Жумладан, Ўзбекистоннинг Вашингтон ва Нью-Йоркдаги дипломатик ваколатхоналарида хизмат қилган.

2018−2023 йилларда у Ўзбекистоннинг Париждаги ЮНЕСКО ҳузуридаги доимий вакили бўлган. 2023 йилда Ўзбекистон Туризм қўмитаси раиси этиб тайинланган.

Умид Шодиев мазкур лавозимга Ўзбекистоннинг БААдаги элчихонасига 2022−2025 йилларда раҳбарлик қилган ва 2025 йил декабрь ойида Туризм қўмитаси раиси этиб тайинланган Абдулазиз Аққулов ўрнига тайинланди.