Ўзбекистон футболининг фахрийси Абдусамат Дурмонов вафот этди

Ўзбекистон миллий терма жамоасининг собиқ футболчиси, 1994 йилги Осиё ўйинлари ғолиби Абдусамат Дурмонов вафот этди. Бу ҳақда Ўзбекистон футбол ассоциацияси хабар қилди.

Абдусамат Дурмонов 1965 йилда Термиз шаҳрида туғилган. У турли йилларда «Сурхон», «Локомотив», «Пахтакор» ва «Нефтчи» жамоалари сафида тўп сурган.

1992–1994 йилларда у Ўзбекистон миллий терма жамоаси шарафини ҳимоя қилган ва унинг таркибида 1994 йил Японияда бўлиб ўтган Осиё ўйинлари ғолиби бўлган.

Дурмонов 2002 йилда футболчилик фаолиятини якунлаб, шундан сўнг мураббийликка ўтди. У «Нефтчи», «Ёзёвон лочинлари» ва «Истиқлол» жамоаларида фаолият юритган. 2015 йилдан бошлаб «Нефтчи» клуби мураббийлар штаби аъзоси эди.