Татаристон раиси Ўзбекистон президентига ҳамдардлик билдирди

Татаристон раиси Рустам Минниханов Нижнекамскга қилинган дронлар ҳужуми оқибатида ўз мамлакатлари фуқаролари ҳалок бўлгани муносабати билан Тожикистон ва Ўзбекистон президентлари Эмомали Раҳмон ва Шавкат Мирзиёевга ҳамдардлик билдирди. Бу ҳақда республика раҳбари матбуот хизмати журналистларга маълум қилди, деб ёзмоқда ТАСС.

«Рустам Минниханов Ўзбекистон ва Тожикистон президентларига ҳамдардлик телеграммаларини йўллади. Ҳалок бўлганлар орасида уларнинг фуқаролари ҳам бор, жами 9 киши», — дея хабар берди матбуот хизмати.

Фото: Telegram / @rustamminnikhanov.

Ҳужум туфайли Тожикистоннинг бир нафар фуқароси ва Ўзбекистоннинг 8 фуқароси ҳалок бўлган. Минниханов телеграммаларда ҳалок бўлганлар ва жабрланганларнинг оилаларига барча зарур ёрдам кўрсатилишини қайд этди.

«Қайтариб бўлмас йўқотиш дардини баҳам кўрамиз. Шу оғир дамларда даҳшатли террор қурбонларининг оилалари билан биргамиз. Уларга матонат, руҳий куч ва сабр, барча жабрланганларга эса тезроқ соғайиб кетишларини тилайман», — деб ёзди Минниханов.

Аввалроқ Татаристон раҳбари матбуот хизмати душанба куни эрталаб республика дронлар ҳужумига учраганини хабар қилганди. Ҳужум ҳам ишлаб чиқариш, ҳам фуқаролик объектларига қаратилган.

13 киши, жумладан, бир бола ҳалок бўлган. 70 дан ортиқ киши ёрдам сўраб мурожаат қилган, 21 киши шифохонага ётқизилган. Ҳолат бўйича террорчилик ҳужуми факти бўйича жиноий иш қўзғатилган. 10 август республикада мотам куни деб эълон қилинди.

• Бир кун аввал Ўзбекистон президенти топшириғи билан ҳодиса юзасидан ҳукумат комиссияси тузилди. Россияга ФВВ, ТИВ, ССВ, Миграция агентлиги ва бошқа тузилмалар вакиллари юборилди.