Ўзбекистонда автомобилларни қайта рўйхатдан ўтказиш учун йиғим яна пасайтирилди

Апрель ойидаги кескин ўсишдан сўнг автомототранспорт воситалари, электромобиллар, автомототранспорт воситалари ва тиркамаларни қайта рўйхатдан ўтказиш ставкаси аввалги ҳажмига — 34 минг сўмга қайтди.

Ички ишлар вазирининг автомототранспорт воситалари ва уларнинг тиркамалари (ярим тиркамалар)ни рўйхатга олиш ва қайта рўйхатдан ўтказиш, мажбурий техник кўрикдан ўтказиш учун ундириладиган тўлов ставкаларига ўзгартириш ва қўшимчалар киритишни назарда тутувчи буйруғи қабул қилинди.

Ўзгартиришларга мувофиқ, автомототранспорт воситалари, электромобиллар, автомототранспорт воситалари ва тиркамаларни қайта рўйхатдан ўтказиш ставкаси эндиликда БҲМнинг 10 фоизини (34 минг сўм) ташкил этади.

Эслатиб ўтамиз, жорий йилнинг апрель ойидан бошлаб автомобилларни қайта рўйхатдан ўтказиш учун йиғимлар кескин деярли 68 баробарга оширилган эди. Электромобиллар, автомототранспорт воситалари ва тиркамаларни қайта рўйхатдан ўтказиш учун йиғим БҲМнинг 1,5 баравари (510 минг сўм), бошқа автомобиллар учун эса БҲМнинг 6,84 баравари (2 миллион 325 минг сўм) тўланиши керак эди.