Жиззахда ресторан ходимларини дўппослаган шахслар жазоланди

Маст йигитлар қизларга гап отиб, жанжал кўтаришган ҳамда жанжални тўхтатмоқчи бўлган ресторан қоровули ва бошқа ходимини калтаклашди.

Жиззах вилояти ИИБнинг маълум қилишича, ҳодиса Жиззах шаҳрининг “Оққўрғонлик” маҳалласида жойлашган савдо мажмуасидаги овқатланиш шохобчасида содир бўлган. Шу ерда маст ҳолда ўтирган йигитлардан бири қўшни столда ўтирган қизларга гап отиши сабаб жанжал юзага келган. Воқеадан хабар топган шохобча қоровули келиб жанжални тўхтатиш мақсадида келишмовчиликка аралашган.

Натижада, йигитлардан икки нафари қоровулни ҳақорат қилиб, унга пиво идишини улоқтирган. Бу ҳам етмаганидек, йигитлар қоровулни калтаклаб, унга оғир тан жароҳати етказган. Уларни ажратишга уринган шохобчанинг бошқа ходими ҳам бир нечта мушт зарбасини еган.

Қоровул олган тан жароҳатлари билан шифохонага ётқизилган. Йигитлар эса ДХХ ва ИИО ходимлари томонидан қўлга олинган. Аниқланишичa, қўлга олинганлардан бири аввал талончилик, давлат органи вакилининг қонуний ҳаракатларига қаршилик кўрсатгани ҳамда қасддан баданга енгил шикаст етказгани сабаб судланиб, аҳлоқ тузатиш жазосини ўтаётган бўлган.

Қонунбузарларнинг бу ишлари судда кўриб чиқилди. Аввал судланиб, аҳлоқ тузатиш жазоси ҳукм қилинган шахснинг бу жазоси озодликдан маҳрум қилиш жазосига алмаштирилди. Унинг шеригига ҳам қонунда белгиланган жазо қўлланилди.