Самарқандда тўрт фарзанднинг онаси рашк сабаб ўзини баландликдан сувга ташламоқчи бўлди

Вилоят ИИБ ҳодиса тафсилотларини маълум қилди.

Самарқанд вилояти ИИБ хабарига кўра, бугун соат 16:00 лар атрофида Самарқанд шаҳрининг Сиёб канали кўпригида 1998 йилда туғилган, 4 нафар фарзанднинг онаси ўзини пастга ташламоқчи бўлган. Ҳодисага рашк сабаб бўлган.

ИИБ ходимлари томонидан аёл билан олиб борилган профилактик тушунтириш ишларидан сўнг, у ниятидан қайтган ва патруль-пост хизмати ҳамда ФВБ ходимлари томонидан қутқариб олинган. Ҳолат юзасидан терговга қадар текширув ҳаракатлари олиб борилмоқда.