Ўзбекистон Ғазо муаммоси бўйича Туркиянинг ташаббусларини ҳар томонлама қўллаб-қувватлайди — Мирзиёев
«Амалда иккиёқлама стандартлар кузатилмоқда. Демократия ва инсон ҳуқуқларини кенг тарғиб қилган давлатлар бу қотилликларга, ваҳшийликларга кўз юммоқда», — дейди Шавкат Мирзиёев.
“Бугун халқаро ҳамжамиятнинг, жумладан, Ғарб давлатларининг фожиага бўлган муносабати бизни қаттиқ хавотирга солмоқда. Амалда иккиёқлама стандартлар кузатилмоқда. Демократия ва инсон ҳуқуқларини кенг тарғиб қилган ва уларнинг ҳимоясида турган етакчи, ривожланган давлатлар бу қотилликларга, бу ваҳшийликларга кўз юммоқда. Албатта, зўравонликни тўлиқ тўхтатиш ва тинчлик жараёнини бошлаш керак. Ғазо фожиаси ҳалигача ҳал қилинмаган Исроил-Фаластин зиддиятининг аянчли оқибатларидир. Барқарор ва узоқ муддатли тинчликка эришиш учун мустақил ва озод Фаластин давлати ташкил этилиши шарт. Аслида Фаластин муаммоси бутун Яқин Шарқ муаммосидир.
Шавкат Мирзиёевнинг қайд этишича, Ўзбекистон ана шу ўткир муаммо бўйича Туркия президенти Эрдоган жаноби олийларининг билдираётган адолатли ташаббусларини ҳар томонлама қўллаб-қувватлайди. Шунингдек, Ўзбекистона муқаддас Ислом динининг асл инсонпарварлик моҳиятини кенг тарғиб этиш борасида олиб бораётган ишлар бўйича ҳамкорликни давом эттиради.
"Ўзбекистон заминида туғилиб, камол топган, мусулмон оламида юксак эътироф этилаётган мутафаккирлар — Имом Бухорий, Имом Термизий, Имом Мотуридий, Абдухолиқ Ғиждувоний ва Баҳовуддин Нақшбанд каби улуғ зотларнинг бебаҳо маънавий-маданий меросига қардош турк халқининг диққат ва эътибори тобора ортиб бораётганини мамнуният билан таъкидладик.
Ҳурматли Эрдоган жаноби олийларининг Ислом динига қарши ҳар қандай салбий ҳаракатларга нисбатан қатъий позицияси ҳам алоҳида эҳтиром ва эътирофга лойиқдир. Биз ҳозир мураккаб вазиятда динимизга қарши ёвуз кучларнинг турли хуруж ва босимларига биргаликда жавоб қайтаришга келишиб олдик”, — дейди Мирзиёев.