Олимпиаданинг футбол баҳсларидаги ҳакамлик олдингиларидан бироз фарқ қилади

Парижда бўлиб ўтадиган Олимпиаданинг футбол баҳсларида эркак ва аёллардан иборат аралаш ҳакамлар бригадалари ишлайди.

Ушбу янгилик эркаклар ва аёллар иштирокидаги йўналишларнинг 1-тур учрашувларига тааллуқли.

Франция ва АҚШ терма жамоалари ўртасидаги эркаклар йўналишининг бугунги ўйинини Яэл Фалкон бошчилигидаги аргентиналик ҳакамлар бригадаси бошқариб боради, уругвайлик Анахи Фернандес захира ҳаками этиб тайинланади.

25 июль куни ямайкалик Данеон Перчмент аёллар терма жамоасининг Франция ва Колумбия ўртасидаги ўйинида ВАР ёрдамчиси сифатида ишлайди.