Олмалиқдаги қамоқхонада 21 ёшли маҳкум вафот этди

Унинг онаси ўғлининг соғлиги яхши бўлганлиги, тўсатдан вафот этгани шубҳали ҳолат эканлигини даъво қилди. Омбудсман ҳолатни назоратга олиб, прокуратурага мурожаат юборди.

Аввалроқ, ижтимоий тармоқда Олмалиқдаги колонияда жазо ўтаётган 21 ёшли спортчи йигит вафот этганлиги ҳақида хабалар тарқалди. Видеода марҳумнинг онаси жорий йилнинг 26-28 январь кунлари ўғли билан узоқ муддатли учрашувда бўлгани ва у соғлиғи бўйича ҳеч қандай шикоят қилмаганини маълум қилган.

Ҳолат юзасидан Инсон ҳуқуқлари бўийча омбудсманнинг маълум қилишича, мазкур ҳолат Олий Мажлиснинг Инсон ҳуқуқлари бўйича вакили (Омбудсман) томонидан назоратга олинган.

14-сон жазони ижро этиш колонияси навбатчилик қисми томонидан берилган маълумотларга кўра, жорий йилнинг 14 февраль куни соат 22:45 да жазо муддатини ўтаётган маҳкум соғлиғида ўзгариш сезгани сабабли колония шифокорларига мурожаат қилган. Биринчи тиббий ёрдам кўрсатилганидан сўнг ҳам унинг ҳолати яхшиланмагани сабабли, у Олмалиқ шаҳар марказий шифохонасига ётқизилган.

Бироқ, кўрсатилган тиббий муолажаларга қарамасдан, маҳкум 15 февраль куни соат 01:00 да шифохонада гипертония ва бирламчи юрак етишмовчилиги оқибатида вафот этганлиги айтилмоқда.

Маълумотларга кўра, марҳумга суд-тиббий экспертизаси тайинланган.

«Ҳозирда мазкур ҳолат Омбудсман ходимлари ва Тошкент вилоятидаги минтақавий вакили томонидан жойига чиқиб ўрганилмоқда. Шунингдек, Омбудсманнинг Фарғона вилоятидаги минтақавий вакили марҳумнинг оила аъзолари билан учрашиб, таъзия билдирган.

Мазкур ҳолат юзасидан Ўзбекистон Республикаси Бош прокуратурасига Омбудсман томонидан мурожаат юборилди. Омбудсман терговга қадар текширув давомида мазкур ҳолатни ҳар томонлама, тўлиқ ва холисона ўрганиш таъминланишини сўрайди. Ҳолатга доир маълумотлар ўрганилмоқда», — дейилади хабарда.