Эстониянинг Ўзбекистондаги янги элчиси тайинланди

Яап Ора Эстониянинг Ўзбекистондаги янги элчиси этиб тайинланди, деб хабар берди ундан ишонч ёрлиқларини қабул қилиб олган ташқи ишлар вазири Бахтиёр Саидов.

Унинг Telegram каналида ёзишича, томонлар икки давлат ўртасидаги икки ва кўп томонлама муносабатларнинг ҳозирги динамикасини муҳокама қилган. Иқтисодий дипломатия, ахборот технологиялари, халқлар ўртасидаги алоқалар, маданият ва бошқа соҳалардаги ҳамкорликни ривожлантиришга алоҳида эътибор қаратилган.

ТИВ вазири элчига Ўзбекистонда муваффақиятли фаолият юритишида омад тилади.

Бундан ташқари, транспорт вазири Илҳом Маҳкамов ҳам Яап Ора билан учрашди ва транспорт соҳасидаги ҳамкорлик алоқаларини ривожлантириш истиқболларини муҳокама қилди.

Хусусан, Эстония портлари ва омборхоналаридан фойдаланган ҳолда юк ташиш ҳажмини ошириш, шунингдек, рақамли хизматлар ва маҳсулотларни ривожлантириш бўйича тажриба алмашиш имкониятлари юзасидан фикр алмашилди.