Ўзбекистон ва Россия ЖСТ бўйича «ҳал этилмаган масалалар»ни муҳокама қилди
11 март куни бош вазир ўринбосари Жамшид Ходжаев бошчилигидаги делегация Москвада Россия иқтисодий ривожланиш вазири Максим Решетников ва унинг ўринбосари Владимир Ильичев билан музокаралар ўтказди.
«Учрашувда Ўзбекистоннинг ЖСТга аъзо бўлиши доирасида бозорга чиқиш бўйича ҳал этилмаган масалалар муҳокама қилинди. Музокаралар фойдали, мазмунли ва конструктив ўтди. Ҳозир иккала томон ҳам жараённинг янада ривожланишидан манфаатдор», — деди Азизбек Урунов.
Шунингдек, у россиялик ҳамкасбларига аввал узатилган материалларга тезкор жавоб бергани учун миннатдорчилик билдирди.
Ходжаев билан учрашувда Решетников Россия ва Ўзбекистон президентлари эришган келишувларни ҳисобига «Россия гази, нефти ва нефть маҳсулотларини етказиб бериш ҳажми ортиб бораётгани»ни маълум қилди.
«Шу нуқтаи назардан, Ўзбекистон энергетика инфратузилмасини модернизация қилиш бўйича режалаштирилган лойиҳаларни амалга ошириш муҳимлиги қайд этилди. Ўзаро озиқ-овқат етказиб бериш ҳажми ошди, бунда Россия ҳажм бўйича деярли паритетга эга: Россиядан Ўзбекистонга 1 миллиард долларга ва Ўзбекистондан қарийб 1 миллиард долларга», — дейилади Иқтисодий ривожланиш вазирлиги хабарида.
11 март куни Россия бош вазирининг биринчи ўринбосари Денис Мантуров ва бош вазир ўринбосари Жамшид Ходжаев икки томонлама ҳамкорликнинг устувор масалаларини муҳокама қилди.
Ўзбекистон делегацияси таркибида Марказий банк раиси Тимур Ишметов ва транспорт вазирининг биринчи ўринбосари Маманбий Омаров ҳам бор эди.
Ўзбекистон делегацияси Россия бош вазири ўринбосари Денис Патрушев билан ҳам учрашув ўтказди ва унда икки давлатнинг агросаноат соҳасидаги ҳамкорлиги муҳокама қилинди.
«Биз Ўзбекистон бозорини [россиялик] экспортчиларимиз учун жуда истиқболли деб биламиз. Биз кунгабоқар ёғи, қандолатчилик, дон ва чорвачилик маҳсулотларини етказиб беришни кўпайтиришга тайёрмиз», — деди Патрушев.
Унинг сўзларига кўра, 2024 йилда Россиядан Ўзбекистонга экспорт қилинадиган асосий маҳсулотлар шакар, кунгабоқар ёғи, қандолат маҳсулотлари, пичан ва шрот, болалар овқатлари бўлган.
Бош вазир ўринбосари РФ Ўзбекистондан мева-сабзавот маҳсулотлари импортини янада оширишдан манфаатдор эканини, уларни тўсиқсиз олиб кириш учун барча зарур шарт-шароитлар яратилганини қўшимча қилди.
Президент Шавкат Мирзиёев 20 декабрь куни Ўзбекистоннинг ЖСТга аъзо бўлиши «якуний босқич»га кираётганини айтганди. Унинг сўзларига кўра, ЖСТ қоидаларига зид бўлган имтиёзлар бекор қилинаётганига қарамай, давлат тадбиркорларни қўллаб-қувватлашда давом этади ва адолатли рақобат муҳитида ишлаш учун барча шароитларни яратади.
Бош вазир ўринбосари Жамшид Хўжаев май ойида Ўзбекистон 2026 йилда Камерунда бўлиб ўтадиган 14-вазирлар конференциясигача ЖСТга аъзо бўлиш ниятида эканлигини маълум қилганди.
Ҳозирда ҳаммаси бўлиб 21 давлат билан музокаралар якунланди. Ўрунов Ўзбекистон Россия, Европа Иттифоқи, Буюк Британия, Швейцария ва бошқа давлатлар билан музокараларни якунлаши кераклигини таъкидлаган.