Туркиядаги Европа мактаблари ўзлигидан нафратланадиган катта қатламни яратишга эришган — Алишер Қодиров

Ўзбекистон Олий Мажлиси Қонунчилик палатаси депутати, «Миллий тикланиш» партияси етакчиси Алишер Қодиров Истанбул мэри Экрем Имамўғлу ҳибсга олинганидан кейин бошланган оммавий норозилик намойишларига ўз муносабатини билдирди.

«Туркиядаги тартибсизликларда бир воқеага эътибор қаратишимиз керак: бир гуруҳ ёшлар маст ҳолатда Истанбулдаги қадимий Шаҳзодабоши жоме масжиди деворларига ҳожат қилиб, тарихий қабрларни бузиб ташлаганлар. Бу тоифа, ўзлигига нафрат билан улғайган қатлам осмондан тушиб қолмаган, тизимли, узоққа мўлжалланган, жамиятларни ичидан бузиш ва вассаллаштиришни мақсад қилган глобал кучларнинг юз йиллардан бери олиб бораётган ишларининг натижасидир», — дея бошланади Қодировнинг пости.

Унинг таъкидлашича, «Туркияда бу ишлар ҳосил берадиган даражада аввал бошланган».

«1924 йилда Туркия Республикаси қурилганида Европа давлатларидан илм оламиз деб Европа мактабларига кенг эркинликлар берилган. Бу мактаблар илм берган, бунга шубҳам йўқ, лекин ўзлигидан нафрат этадиган сезиларли катта қатлам ҳам яратишга эришган. Ўз миллати ва қадриятларидан нафрат этадиган ёшлар ўша мактабларни тугатган авлодларнинг невараларидир», — деди у.

Алишер Қодиров, шунингдек, «Бизда ҳосил йўқ, лекин „дарахтлари“ экилмоқда», — деб таъкидлади.

«Болаларимизга, албатта, энг замонавий билим беришимиз шарт, билим дунёнинг қаерида бўлса ҳам билимдир ва олиниши керак, лекин тарбияда миллий талабларимизни кескин белгилаб, татбиғида муросасиз бўлмасак, келажакда бошимиз ўзимиздан чиқадиган балолар билан оғриши мумкин», — дея фикрини якунлади Қодиров.

Маълумот учун, 19 мартдан буён ўтказилган намойишларда шу кунга қадар 1879 нафар гумонланувчи қўлга олинди. Улардан 260 нафари қамоққа олинган; 468 нафарига нисбатан суд назорати қарори чиқарилган. 662 кишига оид жараёнлар давом этмоқда. 489 нафари озодликка чиқарилган.