Эрон элчихоналари Ўзбекистоннинг норозилик нотасидан сўнг Самарқанд меросига оид постларини ўчирди

Эроннинг Арманистон, Хитой, Зимбабведаги элчихоналари Х ижтимоий тармоғидаги (собиқ Twitter) Самарқанднинг тарихий-маданий меросига оид сиёсий мазмундаги постларини ўчириб ташлади. Бу Ўзбекистон Ташқи ишлар вазирлиги томонидан Эрон томонига билдирилган қатъий эътироз ва талабдан сўнг юз берди.

Эслатиб ўтамиз, 23 октябрь куни Эроннинг Ўзбекистондаги элчиси Муҳаммад Али Искандарий ТИВга чақиртирилиб, унга норозилик нотаси топширилган эди. Вазирлик Самарқанд, Бухоро ва Хива каби шаҳарлар мероси ўзбек халқининг кўп асрлик тарихи ҳамда давлатчилик анъаналарининг ажралмас қисми эканини уқтириб, тегишли постларни ўчириш ва бундай ҳолатларга қайта йўл қўймасликни талаб қилганди.

Мазкур постлар аслида АҚШ давлат котиби Марко Рубионинг Ўзбекистонга ташрифи чоғида, 19 октябрь куни Самарқанддаги Регистон майдони фонида ёзиб олинган чиқишига муносабат сифатида эълон қилинган эди. Видеода давлат котиби шаҳарнинг жаҳон савдосидаги тарихий ўрни ҳақида тўхталиб ўтган.

«Сиз турган жой — форс цивилизацияси ва меъморчилигининг бир қисмидир», — деб ёзган эди Эрон дипломатик ваколатхонаси Х тармоғида. Ушбу хабарда элчихона Рубионинг Афинадаги Акрополь ёнида мазкур цивилизация ҳақида айтган сўнгги фикрларини ҳам танқид қилган.

Марко Рубио 7 октябрь куни сўзлаган нутқида форс шоҳи Ксеркс қўшинлари томонидан Акрополь вайрон этилганини ва спарталикларнинг форс армиясига кўрсатган қаршилигини эслаб ўтган эди. Шунингдек, у Ғарбнинг қаҳрамонлик ҳақидаги тушунчасини Эроннинг амалдаги раҳбарияти идеологиясига қарама-қарши қўйиб, уларни ўлим культини тарғиб қилишда айблаган эди.