Президент матбуот котиби Русланбек Давлетов ва Сардор Умурзоқов янги лавозимларга ўтгани ҳақидаги хабарларни рад этди

Ижтимоий тармоқларда 24 июнь куни президентнинг ижтимоий-сиёсий, диний-маърифий ва ёшлар масалалари бўйича маслаҳатчиси Русланбек Давлетов гўёки бошқа лавозимга ўтказилгани, президентнинг алоҳида топшириқлар бўйича маслаҳатчиси Сардор Умурзоқов эса юқори лавозимга кўтарилгани ҳақида хабарлар тарқалди.

Президент матбуот котиби Шерзод Асадов Gazeta’га берган изоҳида бу маълумотни рад этди.

«Иккаласи ҳам ҳақиқатга тўғри келмайди. Барча тайинловлар ва ишдан бўшатишлар ҳақида кеча эълон қилинди», — деди у.

Бир кун аввал, 23 июнь куни президент Шавкат Мирзиёев ўз маъмуриятида бир қатор кадрлар ўзгаришини амалга оширди, унда президент администрацияси раҳбари лавозими янгидан таъсис этилди. Бу лавозимни давлат раҳбарининг собиқ ёрдамчиси Саида Мирзиёева эгаллади.

Бундан ташқари, унинг ҳуқуқий экспертиза ва комплекс таҳлил масалалари бўйича собиқ маслаҳатчиси Бекзот Мавлонов Ўзбекистон президентининг ёрдамчиси этиб тайинланди. Президентнинг собиқ ёрдамчиси Азиз Магрупов президентнинг ташқи инвестициялар масалалари бўйича маслаҳатчиси бўлди.

Комил Алламжонов Саида Мирзиёеванинг мустақил маслаҳатчиси этиб тайинланди. У инвестициялар, сўз эркинлиги ва мустақил оммавий ахборот воситаларини қўллаб-қувватлаш бўйича маслаҳатлар беради.

Назорат инспекцияси бошлиғи Саидлазиз Саидкаримов, ҳудудий бошқарманинг Ҳудудлар билан ҳамкорлик ва таҳлилий материалларни тайёрлаш бўлими бошлиғи Ўткиржон Қодиров ва ҳудудий бошқарманинг Режалаштириш ва ахборот таъминоти бўлими бошлиғи ўринбосари Жаҳонгир Ибрагимов «бошқа ишга ўтиши муносабати билан» лавозимидан озод этилди.