Ўзбекистон ва Мўғулистон куздан тўғридан тўғри авиақатновларни йўлга қўймоқчи
«Бугун жаноб президент билан БМТ, ШҲТ ва бошқа кўп томонлама тузилмалар доирасида яқиндан ҳамкорлик қилиш ва бир-биримизни қўллаб-қувватлашга келишиб олдик», — деди Шавкат Мирзиёев.
Унинг сўзларига кўра, музокараларда савдо ва инвестиция масалаларига алоҳида эътибор қаратилган. Томонлар яқин йилларда талаб юқори бўлган товарлар номенклатураси ва етказиб бериш ҳажмини кенгайтириш орқали товар айирбошлашни каррасига ошириш вазифасини қўйган.
Улан Баторда Ўзбекистон савдо уйининг очилиши ушбу йўналиш учун асос бўлгани таъкидланди.
Шунингдек, Ўзбекистон ва Мўғулистон қисқа муддатда имтиёзли савдо ва инвестицияларни ўзаро ҳимоя қилиш тўғрисида битимлар тузишга келишиб олди.
«Бир-биримизни самарали тўлдиришимиз мумкин бўлган тармоқларда — фойдали қазилмаларни қазиб олиш ва қайта ишлаш, қишлоқ хўжалиги, чорвачилик, енгил саноат, жун ва тери хомашёсини қайта ишлаш соҳаларидаги ҳамкорликнинг муҳим йўналишлари белгилаб олинди», — деди давлат раҳбари.
Ўзбекистон президенти икки мамлакатнинг транспорт жиҳатидан ўзаро боғлиқлиги муҳимлигини алоҳида таъкидлади:
«Денгизга чиқиш имкониятига эга бўлмаган давлатлар сифатида биз самарали транспорт йўналишларини ривожлантиришда ҳамкорлик қилиш ниятидамиз. Куздан бошлаб мамлакатларимиз ўртасида тўғридан-тўғри авиақатновларни йўлга қўйиш режалаштирилмоқда».
Шунингдек, у маданий ва таълим алмашинуви муҳимлигини таъкидлади.
«Ушбу кунларда Улан Баторда Ўзбекистон маданияти кунлари, сайёҳлик кўргазмаси, концертлар, икки мамлакат муассасалари ўртасидаги учрашувлар бўлиб ўтмоқда. Биз Ўзбекистоннинг етакчи олий ўқув юртларида мўғулистонлик иқтидорли талабаларни квоталар доирасида ўқитишдек эзгу анъанани қайта тиклашга тайёрмиз», — деди Мирзиёев.
«Биз Ўзбекистон билан товар айирбошлаш ҳажмини 10−20 баробарга оширишга келишиб олдик»
Мўғулистон президенти Ухнаагийн Хурэлсух Ўзбекистон ва Мўғулистон янги тузилмалар — Мўғулистон ва Ўзбекистон ҳукуматлараро қўшма комиссияси ҳамда Автотранспорт бўйича қўшма қўмитани таъсис этгани ва 2025 йил февраль ойида уларнинг илк йиғилишларини муваффақиятли ўтказганини таъкидлади.
Унинг сўзларига кўра, томонлар ўзаро товар айирбошлаш ҳажмини сезиларли даражада оширишга келишиб олган, бу кўрсаткич 2024 йил якунига кўра 20,4 миллион долларни, жорий йилнинг тўрт ойи якунига кўра эса 11,3 миллион долларни (ўсиш 2,8 баробар) ташкил этди.
«Томонлар икки мамлакат ўртасидаги товар айирбошлаш ҳажмини 10−20 баробарга ошириш, экспорт-импорт маҳсулотлари номенклатурасини кенгайтириш, корхоналар ўртасидаги ишбилармонлик алоқаларини фаоллаштиришга келишиб олди. Улан Баторда Ўзбекистон савдо уйи очилди».
Унинг сўзларига кўра, Мўғулистон қишлоқ хўжалиги соҳасидаги ҳамкорликни кенгайтириш учун Ўзбекистонга 100 минг бош қўй ва эчки етказиб бермоқда.
Шунингдек, мамлакатлар Мўғулистоннинг кенг яйловлари ва чорвачилик салоҳиятига таянган ҳолда чорвачилик соҳасида йирик қўшма лойиҳа ва дастурларни амалга оширишга келишди.
Президент аввалроқ томонлар авиақатновлар бўйича келишув имзолаганини эслатди. «Жорий йилнинг иккинчи ярмида Мўғулистон авиакомпанияси Улан Батор — Тошкент йўналиши бўйича тўғридан-тўғри рейсларни йўлга қўяди», — деди у.
Транспорт соҳасида, унинг сўзларига кўра, Тошкент — Бишкек — Урумчи — Улан Батор йўналиши бўйича янги автокоридор ишга туширилди, ундан биринчи автокарвон йўлга чиқди.
Мўғулистон раҳбари, шунингдек, «қўшма лойиҳалар ва тажриба алмашиш учун йўл очиб берган» тоғ-кон саноатида ҳамкорлик тўғрисидаги битим имзолангани ҳақида гапирди.
Шунингдек, томонлар таълим соҳасидаги ҳамкорликни кенгайтиришга келишиб олди.
«Ўзбекистонда олий маълумот олган кўплаб мўғул ёшлари мамлакатларимиз ўртасидаги дўстлик кўприги бўлиб хизмат қилмоқда. Олий таълим соҳасида ҳамкорлик тўғрисида имзоланган битим ушбу анъанани қайта тиклаш имконини беради», — деди у.
Мўғулистон президенти спорт алмашинувлари ривожланиб бораётганини ҳам таъкидлади. Хусусан, бокс ва оғир атлетика бўйича ўсмирлар терма жамоалари аллақачон қўшма йиғин ўтказмоқда.
Мўғулистон, шунингдек, Ўзбекистоннинг денгизга чиқиш имконияти бўлмаган мамлакатлар учун халқаро марказ яратиш ташаббусини қўллаб-қувватлагани учун миннатдорлик билдирди.
«Ушбу марказ доирасида биз Ўзбекистон билан барқарор ривожланиш сиёсатини ишлаб чиқиш, бундай мамлакатлар олдида турган тўсиқ ва муаммоларни бартараф этиш, тажриба алмашиш бўйича ҳамкорлик қилишдан мамнунмиз», — дея хулоса қилди Ухнаагийн Хурэлсух.
Эслатиб ўтамиз, Ўзбекистон ва Мўғулистон раҳбарлари кенг қамровли шериклик муносабатларини ўрнатиш тўғрисидаги қўшма декларация ва бошқа ҳужжатларни имзолади.