Франциянинг Ўзбекистондаги янги элчиси лавозимига киришди
Элчи Ўзбекистон аҳолисига ўзбек тилида мурожаат йўллаб, «минг йиллик маданияти ва меҳмондўстлиги билан машҳур мамлакатда ушбу фаолиятини бошлаётганидан хурсандлиги»ни изҳор этди.
«Мамлакатларимиз ўртасидаги тарихий яқинлашувга кўмаклашиш учун сиз билан ҳамкорлик қилиш учун бор кучимни ишга соламан… Келгуси ойларда мен Франция ва Ўзбекистонни боғловчи дўстлик ришталарини сизлар билан бирга мустаҳкамлаш ва умумий келажак қуриш мақсадида барча ҳудудларга ташриф буюраман», — деди у ўз мурожаатида.
Таъкидланишича, Уалид Фук профессионал дипломат бўлиб, иккинчи даражали давлат хизматчиси мақомига эга.
У Париж Сиёсий тадқиқотлар институтида давлат ишлари йўналишида таҳсил олган. Сўнг Франция Ташқи ишлар вазирлигининг Стратегик ишлар, хавфсизлик ва қуролсизланиш бошқармасида ишлаган (2010−2014 йиллар).
2014−2017 йилларда Франциянинг Пекиндаги элчихонасида сиёсий маслаҳатчи бўлиб ишлаган, 2017−2019 йилларда эса Франциянинг Нью Йоркдаги БМТ Доимий ваколатхонасида фаолият юритган.
Шундан кейин у марказий администрацияга Осиё ва Океания бошқармасидаги Узоқ Шарқ бўйича директор ўринбосари сифатида қайтган (2019−2020 йиллар).
Сўнг Уалид Фук Франциянинг Ўзбекистондаги элчиси этиб тайинлангунига қадар Франция президентининг Осиё, Океания ва Америка бўйича маслаҳатчиси (2020−2025 йиллар) сифатида фаолият юритган.
Эслатиб ўтамиз, 2021 йилнинг октябридан буён Франциянинг Ўзбекистондаги элчиси лавозимида ишлаб келган Орелия Бушез мамлакатдаги фаолиятини якунлади. Икки мамлакат ўртасидаги дўстлик ва стратегик шериклик муносабатларини мустаҳкамлашга қўшган ҳиссаси учун элчи «Дўстлик» ордени билан тақдирланди.