Ўзбекистон - икки карра шахмат Олимпиадаси чемпиони!
Чемпионлик тақдири сўнгги тур учрашувлари ҳали давом этаётган пайтдаёқ ҳал бўлди. 11-тур олдидан Ўзбекистон 18 очко билан пешқадам, Ҳиндистон эса 17 очко билан иккинчи ўринда эди.
Ҳиндистон сўнгги турда Венгрия билан 2:2 ҳисобида дуранг ўйнагач, Ўзбекистон Украинага қарши баҳс натижасидан қатъи назар олтин медални математик жиҳатдан кафолатлади.
Шунга қарамай, жамоамиз мусобақани ғалаба билан якунлади. Украинага қарши сўнгги баҳс ҳам Ўзбекистон фойдасига ҳал бўлиб, чемпионликка муносиб нуқта қўйилди.
Терма жамоамиз Самарқанддаги Олимпиадани жуда кучли бошлади. Дастлабки етти турнинг барчасида ғалаба қозонилди. Шу орада асосий рақиблардан Ҳиндистон 2,5:1,5, Хитой эса 3:1 ҳисобида мағлуб этилди.
Фақат 8-турда Германия Ўзбекистоннинг ғалабали юришига тўсқинлик қилди. Аммо жамоа бу натижадан кейин дарҳол ўзини тиклади.
9-турда мусобақанинг биринчи рақамли сарланган жамоаси АҚШ 2,5:1,5 ҳисобида мағлуб этилди. Кейин Арманистон устидан 3,5:0,5 ҳисобидаги йирик ғалаба қўлга киритилиб, Ўзбекистон ҳал қилувчи тур олдидан якка пешқадамликни сақлаб қолди.
Самарқанддаги чемпионлик Жавоҳир Синдоров, Нодирбек Абдусатторов, Нодирбек Ёқуббоев, Шамсиддин Воҳидов ва Муҳиддин Мадаминовдан иборат таркиб билан қўлга киритилди. Жамоага собиқ жаҳон чемпиони Рустам Қосимжонов сардорлик қилди.
Ушбу таркибдаги тўрт нафар шахматчи 2022 йил Ченнайда ҳам Ўзбекистон билан Олимпиада чемпиони бўлган эди.
Шу тариқа, Ўзбекистон сўнгги учта Бутунжаҳон шахмат олимпиадасининг ҳар бирида шоҳсупага кўтарилди: 2022 йил Ченнайда — олтин, 2024 йил Будапештда — бронза, 2026 йил Самарқандда эса яна олтин медаль.
Энг муҳими, навбатдаги чемпионлик Ўзбекистоннинг ўзида, Самарқандда қўлга киритилди. Терма жамоамиз тўрт йил ичида иккинчи марта Open йўналишида дунёнинг энг кучли жамоасига айланди.